“Дарё”да Тошкент шаҳри Янгиҳаёт туман прокуратураси биноси қурилиши учун тадбиркор Шероз Абдуқодировдан 190 миллион сўмлик металл сотиб олингани, бироқ пули тўланмагани, шунингдек, бу бино қурилиши 33 нафар ёлланма ишчининг 160 миллион сўмлик маошини ҳам “ютиб юборгани” хабар берилганди. Мақола жамоатчиликка эълон қилингач, Бош прокуратура бунга муносабат билдириб, вазият назоратга олинганини маълум қилди.
Бош прокуратура ахборот хизмати раҳбари Ҳаёт Шамсутдиновнинг “Дарё”га қўшимча қилишича, бино қурилиши учун 190 миллион сўм металл сотиб олиб, пулини бермаган қурувчига жиноят иши қўзғатилган.
Аниқланишича, Янгиҳаёт тумани прокуратураси биносини қуриш юзасидан ўтказилган тендер савдоларида “Қорақалпоқ-Барҳаёт” МЧЖ ғолиб деб топилиб, буюртмачи ташкилот — шаҳар ҳокимлиги ҳузуридаги “Ягона буюртмачи хизмати” инжиниринг компанияси УК ва “Қорақалпоқ-Барҳаёт” МЧЖ ўртасида пудрат шартномаси имзоланган. Бош пудратчи “Қорақалпоқ-Барҳаёт” МЧЖ томонидан “Нур Собирофф” МЧЖ билан жами 4 та субпудрат шартномалари имзоланган.
Хусусан, 2023 йилнинг 26 октябрь куни тузилган шартномага кўра, “Қорақалпоқ-барҳаёт” МЧЖ қурилиш объектидаги 4 турдаги ишлар учун “Нур Собирофф” МЧЖга жами 1 миллиард 473 миллион сўм пул маблағлари ўтказиб берган, амалда 1 миллиард 69 миллион сўмлик ишлар бажарилган. Амалда бажарилмаган ишлар бўйича тўланган пулларни қайтариш ҳақида “Қорақалпоқ-барҳаёт” МЧЖ томонидан бугунги кунга қадар судга мурожаат қилинмаган, дейди Ҳаёт Шамсутдинов.
Масъул ташкилот шунингдек, иш ҳақи билан боғлиқ муаммони ҳам ўрганганини, бино қурилишида иштирок этган ишчилар иш ҳақини ундириш бўйича Фуқаролик ишлари бўйича Самарқанд шаҳар судига даъво ариза киритилганини билдирди.
Тасдиқланган лойиҳа-смета ҳужжатларида субпудрат ташкилоти “Нур Собирофф” МЧЖга шартнома бўйича берилган иш ҳажмлари учун ишчи кучига 97 миллион 600 минг сўм маблағлар назарда тутилганлиги, ушбу маблағлар муқаддам ишчиларга тўлиқ тўлаб берилганлиги аниқланган. Объектда ишлатилган ишчилар билан расмий меҳнат шартномаси тузилмасдан, иш ҳақи тўғрисида оғзаки келишув бўлганлиги аниқланиб, ишчиларнинг туман прокуратурасига ёзган аризасига асосан Сергели тумани Камбағалликни қисқартириш ва бандликка кўмаклашиш бўлими томонидан ишчиларнинг манфаатида “Нур Собирофф” МЧЖдан иш ҳақини ундириш бўйича фуқаролик ишлари бўйича Самарқанд шаҳар судига даъво ариза киритилган, дейди масъул.
Таъкидланишича, “Нур Собирофф” МЧЖ мансабдор шахслари ва бошқалар жуда кўп миқдорда фирибгарлик қилишда айбланиб, уларга нисбатан жиноят иши қўзғатилган.
“Дарё.uz” сайтига мурожаат қилган Шероз Абдуқодиров металл маҳсулотлари етказиб бериш бўйича “Нур Собирофф” МЧЖ раҳбари М.Собиров билан оғзаки келишганлигини, етказиб берилган маҳсулотларнинг бир қисми бўйича 190 миллион сўм тўлаб берилмаганлигини маълум қилди. Фуқаро Шероз Абдуқодировнинг аризаси ўрганилиб, натижасига кўра “Нур Собирофф” МЧЖ мансабдор шахслари ва бошқаларга нисбатан Жиноят кодексининг 168-моддаси 4-қисми “а” банди (жуда кўп миқдорда фирибгарлик) билан жиноят иши қўзғатилиб, дастлабки тергов ҳаракатлари амалга оширилмоқда, дейди Ҳаёт Шамсутдинов.
Изоҳ (0)