Марказий банкнинг Банк назорати қўмитаси июль ойидаги йиғилишларида (8 марта) 59 та масалани кўриб чиқди ва улар бўйича тегишли қарорларни қабул қилди. Бу ҳақда Марказий банк матбуот хизмати хабар берди.
Маълум қилинишича, рўйхатга олиш ва рухсат бериш йўналишида 51 та масала, жумладан:
- кредит ташкилотлари уставига киритилган ўзгартиришларни рўйхатдан ўтказиш (12 та);
- тўлов ташкилотларининг ташкилий-ҳуқуқий шакли акциядорлик жамиятига ўзгарганлиги муносабати билан тўлов ташкилоти фаолиятини амалга ошириш учун берилган лицензияни қайта расмийлаштириш (12 та);
- тижорат банкларининг чет элда ваколатхона очишга рухсатнома бериш (1 та);
- микромолия ташкилотларини ҳисоб рўйхатидан ўтказиш (1 та);
- тижорат банклари кузатув кенгаши ва бошқаруви аъзолари, шунингдек, муҳим аҳамиятга эга ходимларининг номзодларини кўриб чиқишга доир (21 та) масалалар кўрилди.
Шу билан бирга, тўлов тизими оператори (1 та) ҳамда тўлов ташкилоти фаолиятини (3 та) амалга ошириш учун берилган лицензия чақириб олинди.
Кредит ташкилотларининг молиявий ҳолатига оид 8 та масала — Марказий банкнинг кўрсатмалари ва пруденсиал меъёрлари талабларининг бажарилиши, микромолия ташкилотида ўтказилган текширишлар натижаси ҳам муҳокама қилинди.
Тўлов тизимлари операторлари ва тўлов ташкилотларининг устав фонди ва ташкилий-ҳуқуқий шаклига қўйилган талабларга риоя қилмаганлиги учун 13 та тўлов тизимлари операторлари ҳамда тўлов ташкилотларига нисбатан чора ва санкциялар қўлланилиши тўғрисида огоҳлантирилди.
Шунингдек, амалга оширилган назорат тадбирлари давомида банклар томонидан истеъмолчилар билан ўзаро муносабатларни амалга оширишда амалдаги қонунчиликка риоя қилинмаганлиги учун 20 та тижорат банки огоҳлантирилди.
“Бундан ташқари, қўмита томонидан банк тизими барқарорлигини сақлаш, омонатчилар ва инвесторлар ҳуқуқларини ҳимоя қилиш тамойилидан келиб чиқиб, тижорат банклари бошқарувлари ва микромолия ташкилотлари раҳбариятларига аниқланган камчиликларни тузатиш, улар бўйича тегишли чора-тадбирлар ишлаб чиқиш, ўрнатилган пруденсиал нормативларга амал қилиш, банк фаолиятида мавжуд заифликларни бартараф этиш ва молиявий ҳолатини соғломлаштиришга қаратилган талабларга риоя қилиш юзасидан тегишли кўрсатмалар берилди”, дейилади хабарда.
Изоҳ (0)