Instagram тармоғида 450 мингдан ортиқ обуначига эга бўлган Ҳусан Мирзаҳабибов ўзининг ноодатий санъат тури билан кўпчиликнинг эътиборига тушган. Эндигина 19 ёшни қаршилаган қаҳрамонимиз кубик-рубик ва иплар ёрдамида инсонлар суратини чизади. Тармоққа жойлаган видеоларини эса минглаб обуначилар томоша қилади. Боиси бундай ижод намунаси ўзбек аудиторияси учун янгиликдир.
“Автоҳалокат қизиқишларимни ўзгартирган”
— Зоминдаги оддий оилада дунёга келганман. Дадам тадбиркорлик билан шуғулланади. Онам уй бекаси. Бешта ўғилмиз. Биз Ҳасан ва Ҳусан — кичик фарзандларимиз. Болалигим ҳамма болалар каби оддий ўтган. Аммо содир бўлган бир воқеа сабаб ҳаётим ўзгариб кетди.
Мактабни тамомлаб университетга ўқишга кираман, деб юрган вақтларим автоҳалокатга учрадим. Воқеа қандай бўлганини эслай олмайман. Кўзимни очганимда шифохонада ётардим. Оёқ суякларим синиб кетганди, ҳатто кесиб ташлашлари ҳам мумкин эди. Юриб турган инсон бирдан тўрт девор ичида ётиб қолса қийин экан. Салкам бир ярим йил давомида уйда даволанишимга тўғри келди. Зерикиб интернетдаги суратларни кўриб ўтирсам кубиклардан ясалган сурат эътиборимни тортди. Сўнгра кубик-рубиклардан расм чизишни ўрганиш истаги пайдо бўлди. Яхши расм чизганим учун ўрганишим ҳам осон бўлди. Бу соҳанинг йўналишлари эса жуда кўп. Кубик-рубик ҳам уларнинг бир туридир. Иплардан сурат ишлаш эса яна бир туридир. Аста-секин ўргана бошладим, яна кубик сотиб олишим керак эди. Ота-онам бу сафар ҳам қўллаб-қувватлади. Хитойдан кубиклар сотиб олиб беришди. Ҳозирда уйимда 11 мингдан ортиқ кубиклар бор.
“Битта сурат учун 7 соат вақт сарфлайман”
— Биринчи кубик-рубикдан Дилими тахаллуси орқали танилган блогерни суратини чизганман. Уни тайёрлаш учун 4 кун вақтим кетганди. Биринчи марта тахлаётганимда кубикларим қулаб тушган. Яна қайтадан териб чиққанман. Видео олиб, монтаж қилишни унчалик яхши билмасдим. Аммо кейинчалик ўргандим. Ҳозир вақт машинаси орқага қайтганда, бошқа инсонларни ҳам расмини чизардим. Негаки биринчи суратини ишлашга энг муносиб одамлар кўп эканлигини англадим. Сўнгра кўплаб халқимиз севган инсонларни расмларини тайёрлашни бошладим. Улар орасида чет эл президентлари ҳамда машҳурларнинг қиёфалари ҳам бор. Бир расмни чизишим учун одатда етти соат вақт кетади. Аммо ишни бошлашдан аввал 3-4 кун ўша инсонни ўрганаман. Ижодини кузатиб, суратларини йиғиб юраман. Қандай чизиш-у қандай ҳолатда бўлишини режалаштираман.
Бу орада одамлардан ҳам таклифлар тушди.Тўйларга ҳам таклиф қилиб, ота-онасини суратларини тайёрлашимни сўрайдиганлар бўлди. Бўш вақтимда уларга ҳам бориб тураман. Ўшанда уларнинг қанчалик хурсанд бўлганини кўриб қийинчиликларим, чизиш учун кетган вақтим зое кетмаганидан хурсанд бўламан.
“Ҳамдам Собиров меҳнатимни қадрламади”
— Баъзида бу ишлардан воз кечгим келади. Чунки одамлар ишимни қадрламагандек, тушунмаётгандек ҳам туюлади. Болалар кунида ўзимизнинг туманда панда расмини чиздим. Болалар беғуборлик билан томоша қиларди. Аммо ота-оналари бошқача муносабатда бўлди. Уларни уришиб “юр, вақтимни олма, бекорчи нарсаларга” дея олиб кетганларига гувоҳ бўлдим. Шуни эшитганимдан кейин бошлаган ишимни ҳам чизгим келмай, аранг тугатдим. Шерикларимга битта суратга олиб, йиғиштириб ташланглар, дедим. Бизда кўпчилик бу каби соҳаларни, ижод намуналарини унчалик тушунмайди. Айрим машҳурлар чизган расмларимга жавоб бермаган ҳолатлари ҳам бўлган. Қадрига етиши ҳақида гапирмасам ҳам бўлади. Бошқа давлатларда эса бу соҳадан мусобақалар ҳам ўтказилади. Ҳамдам Собировнинг ижодини яхши кўрганим сабаб унинг туғилган кунига портретини тайёрлагандим. Аммо у ҳеч нарса демади, яъни бир неча соатлик меҳнатимга эътибор ҳам бермади.
“3 минг долларгача даромад топаман”
— Ижодим давомида кўплаб давлат раҳбарларининг ҳам суратларини кубик-рубиклар ёрдамида ишлаганман. Аммо энг севимли суратларим — бу Шавкат Мирзиёев, Шайх Муҳаммад Содиқ Муҳаммад Юсуф ҳазратлари ва биринчи президентимиз Ислом Каримовники бўлиб, уларнинг қиёфасини қайта-қайта тасвирлашдан эринмайман.
Моддият ҳам керак, шу боис пулга ҳам портретлар тайёрлаб тураман. Олдинлари кунига бештагача суратлар тайёрлар эдим. Бир ой узлуксиз шу ҳолатда ишлаганим учун соғлиғимда муаммолар пайдо бўлди. Шу сабаб ҳозир камроқ чизяпман. Бу машғулотим ортидан 1000 доллардан 3000 долларгача пул ишлаб топаман.
“Ноодатий санъатни ривожлантирмоқчиман”
— Келажакда бу соҳани янада ривожлантирмоқчиман. YouTube блогерлик билан шуғулланиш ниятим бор. Ўзим каби ноодатий ишлар билан шуғулланаётган ёшларга ёрдам бериб, уларни оммага танилиши ҳамда бошқа давлатларда бўлаётган мусобақаларда қатнаши учун қўллаб-қувватламоқчиман. Одамлар бунақа ноодатий санъатларни ҳам тушунишига ёрдам бермоқчиман. Чунки мендек ноодатий ишлар билан ҳамма одамлар ҳам шуғулланмайди. Бундай инсонлар эътиборсиз, чекка қишлоқларда қолиб кетишини хоҳламайман, — дейди Ҳусан Мирзаҳабибов.
Гавҳар Эшонқулова суҳбатлашди
Изоҳ (0)