Тошкент шаҳрида яшовчи аёл халқаро фирибгарларнинг катта компания эгасидан қолган 3 миллиард долларлик меросни унга ўтказиб бериш ҳақидаги ёлғонига ишониб, 90 минг доллар пулидан айрилди. Бу ҳақда ИИВ Киберхавфсизлик маркази хабар берди.
Қайд этилишича, жабрланувчи мазкур пулни тўлаш учун ўзи яшаб турган уйини ҳам сотиб юборган. ИИВ Киберхавфсизлик маркази ходими Умиджон Ҳамроқуловга кўра, ҳолат бундан икки ой олдин содир бўлган. Нигериялик фирибгарлар ижтимоий тармоқ орқали аёлга мурожаат қилиб, катта компания эгаси вафот этгани, у ўша миллиардернинг узоқ қариндоши бўлиши эҳтимоли борлигини билдиришган. “Қон анализингизни бизга жўнатасиз ва биз буни текшириб кўрамиз. Агар қариндошлик эҳтимоли тўғри бўлса, компания раҳбаридан қолган 3 миллиард долларлик мерос сизга ўтади”, деган фирибгарлар.
Аёл эса бу ёлғонга ишонган ҳамда қон анализини жўнатган. Буни текшириш учун эса фирибгарларга 1000 доллар пул кўчириб берган. Бир оз вақтдан сўнг у ҳақиқатан ҳам ўша миллиардернинг қариндоши бўлиб чиққани, минглаб одамларнинг қон анализлари текширилиб кўрилганида айнан уники мос келгани ҳақида “хушхабар” олган.
Шу тариқа “мерос”ни расмийлаштириш ишлари бошланган. Фирибгарлар аёлни аввалига катта миқдордаги пулни ўтказиш учун банкдан ҳисобрақам очиши кераклиги ва унда 20 минг доллар пул бўлиши кераклигини билдирган.
Сўнгра босқичма-босқич “чув тушириш” жараёни бошланган: аёл фирибгарларнинг айрим ҳужжатларни расмийлаштириш, адвокатлик хизмати ва бошқа турли баҳоналарига ишониб, бир неча босқичда уларга 90 минг доллар ўтказиб берган. Фуқаронинг бунча миқдордаги пули бўлмаган. Шу сабабли, у ўз яшаб турган уйини сотиб юборган.
Умиджон Ҳамроқуловнинг қўшимча қилишича, бу каби жиноятлар уюшган жиноий гуруҳ томонидан содир этилади. Уларни очиш жуда ҳам қийин ҳисобланади. Дунё тажрибасида айни шу турдаги жиноятларнинг 60-70 фоизи очилмай қолади.
Изоҳ (0)