2025 йилда Ўзбекистонда иссиқ сув ва иссиқлик таъминоти тарифлари бир мартадан ортиқ оширилмайди. Бу ҳақда 8 июль куни Тошкент шаҳрида ўтказилган матбуот анжуманида “Иссиқликтаъминоти” АЖ бошқарув раиси Илҳом Тўраев маълум қилди.
-lKU5lsAp-ct36KJhe.avif)
Илҳом Тўраевнинг айтишича, жорий йил охиригача тарифлар икки марта оширилмаслиги аниқ.
“Чунки газ ва электр энергияси нархлари жойига тушди. Тошкент иссиқлик маркази тарифлари ҳам қайта кўриб чиқилди. Кенгашнинг битта қарори чиқади, тарифлар бир марта оширилади. Тарифларни ошириш оралиғи олти ойни ташкил этади. Агар олти ойда ошмаган бўлса, кейинги ярим йил ичида икки марта оширилмайди. Шуни ҳам инобатга олиш керакки, тарифлар иситиш мавсуми олдидан ва мавсум якунида қайта ҳисоблаб чиқилади”, деди ташкилот раҳбари.
Илҳом Тўраев сўзларига кўра, ҳозирда пойтахтда иссиқлик тарифларини кўтариш бўйича Тошкент шаҳар ҳокимлиги кенгашига таклиф киритилган. Кенгаш тасдиқласа, тарифлар оширилади.
Шу билан бирга, мулоқотда иссиқ сув ва иссиқлик таъминотини субсидиялашдан воз кечилиши айтилган. Илҳом Тўраевнинг таъкидлашича, бу жараён 2030 йилда якунланади.
“Бизда аҳолига пасайтирилган нарх қўлланилади. Тошкент шаҳри ва вилоятларда турлича нархлар белгиланади. Яъни маҳаллий бюджет тўлов қобилиятидан келиб чиқиб субсидия ажратилади. Соҳани ривожлантириш учун иссиқлик таъминотини субсидиялардан озод бўлишимиз керак. Лекин буни бир вақтнинг ўзида амалга ошириш қийин. 2030 йилгача босқичма-босқич субсидиялашдан воз кечамиз. Бунинг учун эса тарифларни йилига икки марта қайта кўриб чиқишимиз лозим. Албатта, нархларни бир мартада юқорироқ ошириш ҳам мумкин, лекин аҳолига қийин бўлиши мумкин. Шуни олдини олиш учун тарифлар йилига бир ёки икки марта қайта кўриб чиқилади ҳамда субсидиялар миқдори босқичма-босқич қисқартириб борилади”, деди ташкилот расмийси.
Аввалроқ 2025 йил январь—июнь ойларида Тошкент шаҳри иссиқ сув ва иссиқлик таъминоти учун давлат бюджетидан 1,3 триллион сўм ажратилгани маълум қилинганди.
Изоҳ (0)