Овқатланишингизда оқсил манбалари қанчалик хилма-хил бўлса, қон босимининг кўтарилиш хавфи шунчалик паст бўлади. Бундай хулосага Хитойнинг бир нечта тиббиёт ва илмий марказлари олимлари келишди.
Тадқиқотчилар Хитойнинг 12 мингдан ортиқ аҳолисининг соғлиги ва овқатланиши ҳақидаги маълумотларни таҳлил қилишди. Бу одамларнинг барчаси 1997 йилдан 2015 йилгача бўлган даврда сўровдан олдинги уч кун давомида ўзларининг овқатланишлари тўғрисида мунтазам равишда ҳисобот бериб туришган. Ҳар бир иштирокчи ўзининг “оқсил хилма-хиллиги бали”ни олди. Бу бал унинг овқатланишида саккизта оқсил манбаларидан нечтаси мавжудлигига қараб ҳисобланган.
Бу оқсил манбалари қуйидагилардан иборат эди: бутун донли маҳсулотлар, тозаланган донли маҳсулотлар, гўшт маҳсулотлари (колбаса, сосиска ва бошқалар), қизил гўшт, товуқ гўшти, балиқ, тухум ва дуккакли ўсимликлар. Ҳар бир манба бир балл олган, шунинг учун тўплаш мумкин бўлган энг юқори балл саккизга тенг бўлган. Кейин тадқиқотчилар гипертония билан касалланиш кўрсаткичларини “оқсил хилма-хиллиги баллари” билан солиштирдилар.
Натижада, икки баллдан кам тўплаганлар билан таққослаганда, овқатланишида максимал оқсил хилма-хиллиги (тўрт баллдан юқори) бўлган одамларда гипертония хавфи 66 фоизга камайиши аниқланди. Бунда гап оқсил миқдори ҳақида эмас, айнан хилма-хиллик ҳақида кетаётганини тадқиқотчилар алоҳида таъкидлашмоқда.
Гипертония хавфи ва истеъмол қилинадиган оқсил миқдори ўртасидаги боғлиқликни ўрганиш натижасида шу нарса маълум бўлдики, овқат билан ҳаддан ташқари кам ёки ҳаддан зиёд кўп оқсил қабул қиладиган одамларда касаллик ривожланиш эҳтимоли энг юқори даражада экан.
Демак, артериал босим кўтарилишининг олдини олиш учун мувозанатли овқатланиш муҳим бўлиб, бунда оқсил битта эмас, балки турли манбалардан олиниши керак.
Изоҳ (0)