Миллиардер Илон Маск ўзининг “Америка” номли партияси тузилганини эълон қилди. Бу ҳақда тадбиркор Х’даги саҳифасида маълум қилди.
Партия тузиш олдидан Маск обуначилари орасида “Америка партиясини тузишимиз керакми?” деган сўровномани ўтказган. Бир сутка ичида унга 1,3 миллионга яқин одам овоз берган. Натижаларга асосан “икки партиявий тизимдан мустақил бўлиш” ғоясини 65 фоиздан ортиқ иштирокчи қўллаб-қувватлаган.
2 га 1 нисбат: сиз янги сиёсий партияни хоҳлайсиз ва уни қўлга киритасиз! Мамлакатимиз сарф-харажатлар ва коррупция туфайли банкрот бўлиши масаласига келганда, биз демократияда эмас, бир партияли тизимда яшаяпмиз. Бугун “Америка партияси” сизга озодлигингизни қайтариш учун тузилди, деб ёзди Илон Маск ижтимоий тармоқдаги саҳифасида.
Янги партия тузиш сўровномаси АҚШ президенти Дональд Трамп томонидан “катта ва ажойиб” деб таърифланган солиқ тўғрисидаги қонун имзолангани сабаб бўлди.
Дастлаб қонун лойиҳаси Маск томонидан қаттиқ танқидга учради ва бу ҳолат унинг Трамп билан жанжалига сабаб бўлди. Қонунга кўра, АҚШ мудофааси ва чегараларини қўриқлаш харажатлари ошиб, баъзи ижтимоий дастурларни молиялаштириш қисқаради. Маск эса бу бизнесига таъсир қилишидан хавотирда.
Миллиардер қарор қабул қилинса, “Америка” партиясини тузиш билан таҳдид қилганди. АҚШ президенти эса миллиардернинг бизнесини субсидиялардан маҳрум қилишини айтган. Натижада Маск “ватани Жанубий Африкага қайтиш“га мажбур бўлишини айтганди.
Маск ва Трамп июнь ойи бошида юқоридаги қонун лойиҳаси устида зиддиятга борган эди. Миллиардер бу ташаббусни “жирканч” деб атаган ҳамда иқтисодиёт учун салбий оқибатларга олиб келишини айтган. АҚШ президенти эса Илон Маск қонун лойиҳасидан жуда яхши хабардорлиги, тадбиркор электромобиллар учун имтиёзлар бекор қилинаётгани сабаб норози бўлаётганини таъкидлаган.
Бунга жавобан Маск АҚШ президентини ёлғончиликда айблаганди. Кейинчалик миллиардер президент ҳақидаги бир нечта постлари учун узр сўраб, “ҳаддан ошиб кетганини” тан олган. Америка етакчиси, ўз навбатида, Маскнинг узрларини “жуда самимий” деб атаганди.
Изоҳ (0)