1912 йилда чўкиб кетган Титаник кемасидан ноёб тақинчоқ сув юзасига олиб чиқилди. Бу ҳалок бўлган йўловчилардан бирига тегишли бўлган қора шишадан ясалган маржон бўлиши мумкин. Бу ҳақда The Daily Mail хабар бермоқда.
Маълум қилинишича, маржон тарқоқ бўлаклар ҳолида топилди ва қисмларга бўлиб чиқариб олинган. У кеманинг олд ва орқа қисмларидан қолган парчалари орасида жойлашган бўлган. Бўлакларни денгиз тубидаги қаттиқ массадан (конкрециядан) эҳтиёткорлик ва сабр-тоқат билан ажратиб олишга тўғри келган. Қаттиқ чўкинди 3,8 км чуқурликдаги кучли босим шароитида физик ва кимёвий жараёнлар натижасида ҳосил бўлган.
Чиқариб олингач, маржон қайта тикланган. Буюм мураккаб нақшни ҳосил қилувчи юрак шаклидаги мунчоқлар ва қора шишадан ясалган саккизбурчаклар билан безатилган. Олимларнинг таъкидлашича, ўнлаб йиллар давомида сув остида ётган маржон “ҳалокат, вақт ва табиат” синовларидан ўтган.
Тадқиқотчилар маржон эгасининг шахсини энди аниқлаб бўлмаслигини таъкидлади. Эҳтимол, унинг эгаси ҳалокат пайтида ҳалок бўлгандир. Бироқ у омон қолганлардан бирига тегишли бўлиб, тўс-тўполонда йўқолган бўлиши ҳам мумкин.
Таъкидланишича, топилган ушбу буюм 1912 йил модасини чуқурроқ ўрганиш имконини беради. Ўша пайтда қора тақинчоқлар Виктория даврида машҳур бўлган француз гагати каби материаллардан ясалган.
Илгари олимлар Титаникнинг рақамли нусхасини яратган эди. Улар сув ости роботи томонидан олинган суратларга асосланишган. Лойиҳа кеманинг ҳалокати сабабини очиб берди. Маълум бўлишича, айсбергнинг тешиклари кеманинг бутун узунлиги бўйлаб ўтган. Сув барча бўлинмаларга кириб, Титаникни чўктириб юборган.
Изоҳ (0)