АҚШ президенти Дональд Трамп ўзига тегишли Tesla автомобилини сотишни режалаштирмоқда, деб хабар бермоқда The Washington Post.
“Президентнинг электромобилдан воз кечиши ҳақидаги миш-мишлар Трамп ва Маск ўртасидаги келишмовчиликлар фонида пайдо бўлди”, деб ёзади нашр.
Трамп ва Маск ўртасида жамоатчилик олдида келишмовчилик юзага келди. У Маскнинг Оқ уйдан кетиш қарорига боғлиқ бўлди.
Бунга қадар Трамп Германия канцлери Фридрих Мерц билан учрашувда Маскнинг Оқ уй маъмуриятига нисбатан танқидларидан норози эканини айтган. Президент Маск учун жуда кўп иш қилганини, илгари улар яхши муносабатда бўлганини эслатган, аммо ҳозир бундай дейиш мумкинми-йўқми, билмаслигини таъкидлаган.
Трампнинг бу баёнотига Илон Маскнинг ижтимоий тармоқ Х’даги постлари сабаб бўлди. У Трамп илгари сурган “Ягона, катта ва чиройли” номли қонун лойиҳасини кескин танқид қилган. Лойиҳада федерал харажатларни қисқартириш кўзда тутилган эди. Маск уни “жирканч” деб атаб, уни қўллаб-қувватлаган конгресс аъзоларини ҳам қоралаган.
Дональд Трамп Tesla электромобилини 2025 йил бошида Илон Маскдан шахсан ўзи харид қилган эди. У давлат раҳбари сифатида Мodel S русумидаги қизил рангдаги автомобилни танлаб, унинг ташқи кўриниши ва интерерини юқори баҳолаганди.
Дональд Трамп ва Илон Маск ўртасидаги зиддият сиёсий келишмовчиликлардан келиб чиққан. Маск Трамп илгари сурган “Ягона, катта ва чиройли” номли қонун лойиҳасини очиқчасига танқид қилганини президент шахсий хиёнат деб қабул қилди. У Маскни илгари ҳимоя қилганини эслатиб, энди у билан муносабатлар ўзгарганини билдирди. Бу можаро Трампнинг Tesla автомобилидан воз кечиш қарорига ҳам сабаб бўлди.
Маск Трампга 2024 йилда қайта сайланишига ёрдам бериш учун катта молиявий ёрдам кўрсатган. Сайлов давомида тахминан 277 миллион доллар сарфлагани айтилган. Трамп қайта сайланганидан сўнг, Маск ҳукумат харажатларини камайтириш ва самарадорликни ошириш мақсадида “Ҳукумат самарадорлиги бўлими” ёки DOGE деб аталадиган бўлимга раҳбарлик қилган.
Маск май ойи охирида бу маъмуриятни бизнесга қайтиш истаги ва DOGE’даги харажатларни камайтириш бўйича саъй-ҳаракатларидан ҳафсаласи пир бўлгани учун тарк этганди.
Маълумот ўрнида, АҚШ президенти Дональд Трамп ва уни президентлик пойгасида фаол қўллаб-қувватлаган миллиардер Илон Маск ўртасидаги зиддият янги босқичга чиқди. Олдинроқ уларнинг ҳар иккиси ўз ижтимоий тармоқлари Truth Social ва Х’да айбловлар ёғдирган эди.
Изоҳ (0)