Актёрлик карьерасида рол танлаш ғоят муҳим аҳамиятга эга. Машҳур сериал ёки фильмда иштирок этиш бир кечада номи унча танилмаган актёрни ҳақиқий юлдузга айлантириши, муваффақиятсиз лойиҳадаги рол эса карьера ривожига жиддий зарар етказиши мумкин.
Кон Ю ва “Қуёш авлодлари”
“Қуёш авлодлари” замонавий Кореянинг энг машҳур драмаларидан бири саналади. БМТ тинчликпарвари капитан Ю Ши Жин ва ҳарбий шифокор Кан Мо Ённинг севги қиссаси бутун дунё томошабинларини ўзига ром этди. Ҳозирда жасур ҳарбий ролини Сон Жун Гидан бошқа ҳеч ким ижро эта олмайдигандек туюлса-да, у бош ролга таклиф қилинган ягона актёр эмасди. “Шаҳзоданинг биринчи қаҳвахонаси” драмасининг юлдузи Кон Ю ҳам Ю Ши Жин капитан ролини ижро этиш учун жиддий номзод сифатида кўриб чиқилганди. Бироқ Кон Ю жуда банд иш жадвали ва сочини калталатиши сабабли таклифни рад этади. Натижада ижодкорлар Сон Жун Гини танлади, Кон Ю эса кўп ўтмай бошқа машҳур “Иблис” драмасидаги ажойиб ижроси билан томошабинларни лол қолдирди.
Чан Хёк ва “Сирли боғ”
Корейс фантастик сериали “Сирли боғ” 2010 йилнинг энг машҳур асарига айланди. Ёмғир пайтида таналари алмашиб қолган тадбиркор Ким Жу Вон ва камбағал, бироқ мағрур каскадёр аёл Гил Раим ўртасидаги муҳаббат қиссаси томошабинлар эътиборини тортди. Дастлаб сериал ижодкорлари “Буюк умид” ва “Раҳмат” сериалларида рол ижро этган кореялик актёр Жанг Ҳёкни Ким Жу Вон ролида кўришни исташган. Бироқ актёрнинг “Сирли боғ”да қатнашиши унинг агентлиги таклифни рад этгани сабабли амалга ошмади ва 2010 йилда у бошқа машҳур сериал “Қул овчилари”да бош ролни ижро этди.
Экранда Ким Жу Вон образини актриса Ҳа Жи Вон билан ҳамкорликда ўйнаган актёр Ҳён Бин ажойиб тарзда гавдалантирди. Сериал эфирга чиққандан сўнг актёрнинг исми ва юзи машҳур газеталар саҳифаларида, телевидение ва интернетда тез-тез учрай бошлади — бу ҳодиса “Ҳён Бин синдроми” деб ном олди.
Пак Шин Хе ва “Қирмизи юрак”
Ли Жун Ги ва Айю (Ли Жи Ин) бош ролларда суратга олинган “Қирмизи юрак” тарихий корейс сериали чиққанига 9 йил бўлган бўлса-да, ҳамон кўплаб томошабинлар томонидан севиб томоша қилинмоқда. Корё сулоласининг тўртинчи валиаҳд шаҳзодаси Ван Со ва танасида XXI аср қизи Ко Ха Жин жойлашган ёш аристократ аёл Хе Suning драматик севги қиссаси ватанида катта шов-шувга сабаб бўлмаган бўлса-да, чет элларда бу сериал ҳақиқий сенсацияга айланди.
Суратга олиш ишларига тайёргарлик кўриш жараёнида сериал ижодкорлари бош ролни “Сен гўзалсан”, “Меросхўрлар” ва “Пиноккио” каби романтик сериаллар юлдузи, актриса Пак Шин Хега топширишни исташган. . Бироқ Пак Шин Хе иши кўплиги туфайли бу таклифдан воз кечишга мажбур бўлди ва 2016 йилда “Шифокорлар” сериали ҳамда “Биродар” фильмида бош ролларни ижро этди.
Хе Су роли машҳур корейс қўшиқчиси Айюга насиб этди. У бундан олдин ҳам бир нечта сериалларда рол ўйнаганди. Сарой ва романтик эҳтирослар гирдобига тушиб қолган ёш аристократ аёл образи ёш актрисанинг ижрочилик маҳоратини жиддий синовдан ўтказди, бироқ у бу вазифани аъло даражада уддалади. Ли Жун Ги ва Айю қаҳрамонларининг экрандаги жуфтлиги сериалнинг ҳақиқий кўркига айланди.
Юн Ин Хе ва “Ўзга сайёралик маҳбубим”
Ким Су Хён ва Чон Жи Хён бош ролларда ижро этган “Ўзга сайёралик маҳбубим” номли фантастик романтик драма 400 йилдан бери Ерда яшаётган ўзга сайёралик То Мин Жун ва ғалати феъл-атворли актриса Чхон Сон-и ўртасидаги муҳаббат қиссасини ҳикоя қилади. Дастлаб бош рол актриса Юн Ин Хега берилган эди. У машҳур “Шаҳзоданинг биринчи қаҳвахонаси” драмасида ўзини йигит қилиб кўрсатишга мажбур бўлган Ко Ин Чхан исмли қиз ролини ижро этгани билан танилган эди. Бироқ актриса ошкор қилинмаган шахсий сабабларга кўра ролни рад этади. Кейинчалик Юн Ин Хе “Ўзга сайёралик маҳбубим” фильмида рол ўйнашдан воз кечганидан афсусланганини тан олди.
Натижада ўзга сайёраликка кўнгил қўйган актриса Чхон Сон-и образини Чон Жи Хён ажойиб тарзда гавдалантирди. Ким Су Хён билан биргаликда улар томошабинларнинг севимли жуфтлигига айланди. Уларнинг қаҳрамонлари кадрда истеъмол қилган корейс қовурилган товуғи эса сериал намойиши тугагач, дунёнинг турли мамлакатларида ҳақиқий феноменга айланди.
Чон Гин Сок ва “Гулдан ҳам гўзал йигитлар”
“Гулдан ҳам гўзал йигитлар” номли романтик корейс сериалининг бой оила вориси Го Жун Пё ва оддий камбағал қиз Гим Жан Ди ўртасидаги севги тарихи аллақачон афсонавий даражага етган. Дастлаб, бош эркак ролини ижро этиш учун ўша пайтда “Хон Гилдон” тарихий сериалидаги асосий роллардан бири билан танилган корейс актёри Жанг Гин Сок танланган эди. Бироқ Жанг Гин Сок бошқа лойиҳани танлайди. У классик мусиқа ва симфоник оркестр созандаларига бағишланган “Бетҳовен вируси” сериалида бош ролни ижро этади.
F4 деб аталувчи тўртта чиройли ва бадавлат йигитлар сардори Го Жун Пё ролини ёш кореялик актёр Ли Мин Ҳо қўлга киритди ва бу унинг учун ҳақиқий шуҳрат чўққиси бўлди. Сериал бутун дунё бўйлаб катта шов-шувга сабаб бўлди ва Ли Мин Ҳони Осиёнинг ҳақиқий суперюлдузига айлантирди. Жанг Гин Сок эса ўз навбатида “Сен гўзалсан” мусиқий-романтик сериалида юлдузлик лаҳзаларини бошдан кечирди.
Изоҳ (0)