Баъзи юлдузлар ташкилотчилардан саройга ўхшаш шароит яратишни талаб қилса, бошқалари соддаликни афзал кўриб, безовта қилмасликни сўрашади.
Саҳна ортидаги ҳаёт шу ердан бошланади. Томошабинлар залда олқишлаб, артистларнинг чиқишини кутаётган пайтда, пардозхонада ҳеч ким бекор ўтирмайди: юлдузлар образини ўзгартиради, чиқишга тайёрланади, жамоасига топшириқлар беради, ҳатто айримлари ўз мухлислари учун жонли эфирда контент яратади. Келинг, жаҳон юлдузларининг пардозхоналарига назар ташлаб, уларнинг концертлардан олдинги вақтлари қандай ўтишини билиб оламиз.
Бейонсе — жимжитлик ва ҳидсиз мевалар
Бейонсенинг пардоз хонаси ҳақиқий қулайлик, хотиржамлик ва осойишталик ҳукм сурадиган макондир. Ҳеч қандай ўткир ҳидлар йўқ, ҳатто хушбўй шамлар ҳам текширилади: билинар-билинмас ҳидли нейтрал нарсалар қўйилади. Мевалар эса ҳидсиз бўлади. Бейонсенинг ҳид сезиш қобилияти жуда кучли, шунинг учун у ўткир ҳидлар кайфиятини бузиши мумкинлигига ишонади. Хонада хира ёруғлик, мулойим ранглар ва тўлиқ дам олиш муҳити яратилиши шарт.
Муҳит “Қиролича Би” керакли ҳолатга кириши учун қимматбаҳо спа-салон ёки ёга студиясини эслатиши лозим. Ходимлар одатдагидан секинроқ гапиради, асосий қоида — ҳеч қандай тартибсизлик ва шовқин-сурон бўлмаслиги керак.
Бейонсе тирноқларигача мукаммалликка интилувчи шахс, шунинг учун ҳамкасблари унинг талабларини инжиқлик эмас, балки саҳнага чиқишдан олдин ички мувозанатни сақлаш усули деб билишади.
Леди Гага — ёритгичли кўзгулар, ниқоблар тўплами ва бар
Леди Гаганинг пардозхонаси эшиги ортида унинг ўзига хос олами бошланади, бу ерда тинчликка ўрин йўқ. Бу ерда ҳамма нарса бор — театр ёритгичли кўзгулардан тортиб, ниқоблар ва бош кийимларнинг бутун тўпламигача.
Пардозхонадаги муҳит замонавий қизлар кечасини эслатади: бир бурчакда коктейллар, бошқасида либослар кийиб кўрилади, бу ерда эса рақс ҳаракатлари машқ қилинади. Бу хона бир вақтнинг ўзида ҳам кийиниш хонаси, ҳам мини-синовлар майдони, ҳам бутун ижодий гуруҳ тўпланадиган жой. Бу ерга дўстлар ҳам кириб туради ва шу ернинг ўзида коктейл зиёфатлари уюштирилади.
Мутлақо бўлмаслиги керак бўлган нарса — зерикиш. Ҳамма нарса илҳомлантирадиган бўлиши лозим. Ижтимоий тармоқлардаги айрим мухлислар пардозхонани “Леди Гаганинг кичрайтирилган олами” деб аташади. Чунки бу ерда ҳамма нарса худди юлдузнинг ўзи каби ҳайратланарли, ёрқин ва кутилмаган.
Ариана Гранде — қаҳва машинаси ва мукаммал ёруғлик
Ариана Гранденинг пардоз хонаси — тўхтатиб қўйилган жонли влогга ўхшайди. Бу ерда ҳамма нарса видео суратга олишга мослаб қурилган: оқ деворлар, мукаммал ёруғлик, ҳалқасимон чироқ ва ноутбук. Саҳнага чиқишдан олдин Ариана кўпинча GRWM (Get Ready With Ме) видеоларини суратга олади, бунда мухлислар унинг пардоз қилишини, визажистлар билан ҳазиллашишини ва аксессуарлар танлашини кўришлари мумкин.
Мажбурий нарсалардан: профессионал қаҳва машинаси, аниқ R&B плейлистли карнай, барча гаджетлар учун қувватлагичлар ва қулай кресло бўлиши муҳим. Сув фақат газсиз ва сўралганда муз билан, енгил газаклар эса чиройли ёзувли банкаларда бўлиши шарт.
Ёш юлдузнинг пардозхонасини севимли брендлар косметикаси, шахсий чироғи ва қулоқчинларсиз тасаввур қилиб бўлмайди. Аммо у ерда баланд овозлар, камера чақнашлари ва ўткир ёруғлик бўлмаслиги лозим.
Билли Айлиш — ҳамма нарса уйдагидек бўлиши керак
Билли Айлишнинг пардоз хонаси ялтироқликдан йироқ. Бу ерда қулайлик ва озгина тартибсизлик ҳукм суради: полда худи, чипс қутилари, чўзилиш учун гиламча, юмшоқ диван ва Билли Netflix томоша қиладиган ноутбук. Хира ёруғлик, деворлар нейтрал рангда. Бу жаҳон юлдузининг парда ортидаги хонасидан кўра кўпроқ ўсмир қизнинг хонасига ўхшайди. Ҳатто пардоз ҳам кайфиятга қараб қилинади, стандарт бўйича эмас.
Қўшиқчи сукунат, севимли қўшиқлари бор колонка, чалғитувчи товушлар чиқармайдиган музлаткич, қадоқланган ва дастурхонга тортилмаган енгил таомларни талаб қилади. Билли чақирмагунча бу хонага ҳеч ким кирмайди. Қўшиқчининг стилисти бир суҳбатда ҳазиллашиб: “У ерда ҳатто мен ҳам меҳмонман”, деган эди.
Изоҳ (0)