Тошкентда ЙПХдан қочиб, ўнлаб машиналарни уриб кетган Gentra ҳайдовчиси ушлангани хабар қилинганди. Пойтахт ИИББ автомобилни бошқарган аёл ҳайдовчилик гувоҳномасига эга бўлмаганини маълум қилди.
Ижтимоий тармоқларда кенг муҳокамаларга сабаб бўлган воқеа 19 апрель куни тонгги соат 7:30 ларда содир бўлганди. Чилонзор туманидаги чорраҳада хизмат олиб бораётган ЙПХ инспектори ЙТҲ содир этиб, воқеа жойидан яширинишга уринган Gentraъга тўхташ ишорасини берган.
У тўхташ ишорасига бўйсунмай, 2 та Damasъга техник шикаст етказган ҳолда қочишга уринган. Ўзи билан бир йўналишда ҳаракатланиб кетаётган яна бир нечта автомашинага ҳам шикаст етказган.
Кўрилган чоралар натижасида машина тўхтатилиб, ҳайдовчи ва йўловчилар текширилганда номаълум моддалар борлиги аниқланган. Аёл машинани наркотик модда таъсирида бошқарган.
Ўзини Gentra эгасиман, деб таништирган йигитнинг сўзларига кўра, автомобиль унинг отасининг номида бўлган. Аёл автомобилни ҳайдаб кўришни сўраганида йигит унга рул бошқарувини берган.
Ҳолат юзасидан Жиноят кодексининг 277-моддаси (безорилик) 3-қисми “г” банди билан жиноят иши қўзғатилиб, тергов ҳаракатларига киришилган. Гумон қилинувчи шахслар процессуал тартибда ушланган.
Ҳозирда жабрланувчиларга етказилган моддий зарарни аниқлаш бўйича тегишли экспертизалар тайинланган.
ЙПХ ходимларига бўйсунмаган ҳайдовчилар:
Тошкентда 11 апрель куни “мигалка” ўрнатиб олган рақамсиз Spark ҳайдовчиси ЙПХ ходимларидан қочганди. Ҳайдовчи ходимларнинг кўрсатмасига амал қилмасдан, ҳаракатини давом эттирган. У бир неча бор светофорнинг қизил чироғига бўйсунмайди. Ходимлар автомашинани тўхтатиб, уни жарима майдончасига қўйди. 5 апрель куни юқори тезликда ҳаракатланган Malibu ҳайдовчиси ЙПХ ходимини “капот” устида судраб кетганди.
Қашқадарё вилоятининг Ғузор туманида эса ЙПХ ходимига фаол қаршилик кўрсатиб, уларга қўл кўтарган Cobalt ҳайдовчиси қамоққа олинди.
Изоҳ (0)