“Муҳташам юз йил” тарихий сериали кенг аудиторияни турк кинолари дунёси билан таништирди. Айнан шу сериалдан бошлаб шарқ гўзал аёллари ва барно йигитларига қизиқиш бир неча баробар ошди. Турк сериали юлдузлари кўплаб мухлисларга эга бўлишди, уларнинг ҳар бирининг ижодини чуқур ўрганишди. Бош роллардан тортиб фильмда ўзининг дебют бир дақиқалик эпизодини ўйнаганлар ҳам томошабинлар эътиборида бўлди.
- “Тақиқланган муҳаббат” (2008)
11 йил олдин Адан хотинини йўқотиб, оғир қайғуга ботган эди. Шундан бери у ўз фарзандлари — қизи Ниҳал ва ўғли Булент, жияни Беҳлул ва энага аёл билан бирга ёпиқ ҳаёт кечирарди. Бева эркакнинг бир маромдаги ҳаёти ёш, гўзал Биҳтер билан танишганда тубдан ўзгаради. Ниҳоят у юрагини яна очишга тайёр бўлган қизни топди. Аммо бу гўзал қизнинг Истанбулдаги қасрга келиши унда яшовчи ҳар бир инсоннинг ҳаётини ўзгартиради.
“Муҳташам юз йил”дан актёрлар: Небаҳат Чеҳре, Нур Феттаҳоғлу, Толга Ўзтурк.
- “Гунеш қизлари” (2015)
35 ёшли адабиёт ўқитувчиси Гунеш уч қизини ёлғиз тарбиялайди ва энди ўз севгисини топиш ва турмушга чиқишдан умид қилмайди. Аммо бир куни худди эртакдаги каби, унинг камтарона масканига ғамхўрлиги билан ажралиб турадиган Ҳалук Мертўғлу кириб келади ва улар турмуш қуришади. Эртак бахтли тугаши мумкин эди, аммо тўйдан кейин ҳамма нарса кескин ўзгаради: Ҳалукнинг оиласи уч ўгай болага тайёрмас ҳамда Ҳалук ҳам ўзини кўрсатгандек, юмшоқ ва меҳрибон эмас эди.
“Муҳташам юз йил”дан актёрлар: Эврим Алася, Толга Сариташ, Буржу Ўзберк, Ирем Ҳелвачиўғлу.
- “Севги изтироби” (2015)
Ниҳоннинг тадбиркор отаси ўз бизнесида жиддий муаммоларга дуч келади. Унинг бизнес шериги Ғолиб унга бу ботқоқликдан чиқиш йўлини таклиф қилади, аммо бунинг учун у қизини унинг худбин ўғли Амирга турмушга бериши керак эди. Ниҳон эса бошқасига, оддий сартарошнинг ўғли Камолга ошиқ. Шафқатсиз Амирнинг Ниҳон билан ҳаёти яхши кечмади, қиз бахтини фақат Камол билан кўрарди. Аммо Амир уларнинг бахтини кўра олмайди.
“Муҳташам юз йил”дан актёрлар: Бурак Ўзчивит.
- “Кеча маликаси” (2016)
Селин — ёш гўзал қиз. Онаси француз, отаси турк. Қиз Францияда яшайди ва кичик атир дўконига эга. Картал — бой, чиройли, ўзига ишонган Туркиянинг ёш бизнесменларидан бири. Икки ёш бир-бирига ошиқ бўлишади ва қуёш ботганда “Кеча маликаси” деб номланган ноёб гулнинг гўзаллигига маҳлиё бўлиб ўтиришади. Афсонага кўра, бу гулни кўрган жуфтлик энг мустаҳкам ришталар билан боғланади. Аммо тун тугайди, севгидан илҳомланган Картал Истанбулга қайтади. У ерда уни ўгай отаси Азизнинг қизи Эсра кутмоқда. Бир неча йил ўтгач, Селин боласи билан Туркияга келади ва бева Азиз билан учрашади. Қиз янги севгилисининг уйида ким билан танишиши хаёлига ҳам келмайди.
“Муҳташан юз йил”дан актёрлар: Селим Bayraktar, Марям Узерли, Ниҳан Буюкагаш.
- “Сен менинг ватанимсан” (2016)
Жевдет ва Азиза исмли жуфтлик Измир шаҳрида яшайди ва уч фарзандни тарбиялайди: икки қиз Йилдиз ва Ҳилал ҳамда ўғли Али Кемал. Улар билан Жевдетнинг онаси яшайди, у келинини жуда яхши кўради ва уни қизи каби кўради, уй ишларида ёрдам беради. Жевдет — ҳарбий, Туркия армиясининг капитани, у камдан кам уйда бўлади. Шундай кунларнинг бирида ёмон хабар келди — Греция Измирни босиб олишга қарор қилди, ҳукумат душманга қаршилик кўрсатмасликни тавсия қилади. Аёллар эркакнинг уйга қайтишини хавотир билан кутмоқда, лекин ундан ҳеч қандай хабар йўқ. Шунда узоқ вақтдан бери Азизага яширинча ошиқ бўлган ва уларнинг эр-хотинлик ҳаётини бузишни орзу қилган капитан Тевфик пайдо бўлади. Унинг фикрича, ҳозир бунинг учун энг қулай вақт. Ҳаммани ҳайратга соладиган нарса шуки, Жевдет энди душман томонида бўлиб, уйга қайтади.
“Муҳташам юз йил”дан актёрлар: Ҳалит Эргенч, Бергузар Корел, Боран Кузум, Окан Ялабик, Ҳакан Салинмиш.
- “Менинг онам” (2016)
Мелек исмли қизча болалигидан зўравонлик нима эканлигини яхши билади. Кичкина қиз ўз онаси ва унинг севгилисининг салбий таъсиридан азият чекади, лекин ҳар сафар яхшиликка умид қилади. Ҳатто энг даҳшатли вазиятда ҳам у яхши ҳаёт ҳақида орзу қилишни тўхтатмайди. Бир пайт унинг орзулари рўёбга чиқади: Мелек Зайнаб исмли меҳрибон ўқитувчи билан танишади. Ўқитувчиси қизалоқнинг қандай азоб чекаётганини, оч қолишини, кўкарган ҳолда юришини кўради. Ўқитувчида оналик инстинкти уйғонади ва жиноятга қўл уради, у қизчани ўғирлаб, янгидан бахтли ҳаёт бошлашни истаган эди.
“Муҳташам юз йил”дан актёрлар: Ваҳиде Перчин, Ализе Гўрдум, Аксен Эрол, Жансу Дере.
- “Фи, Чи, Пи” (2017)
Жан Манай — муваффақиятли карьера, телекўрсатув, педагогик фаолият ва гўзал ҳаётга эга машҳур психотерапевт. Аммо бир куни у бир кўришдаёқ ёш талаба Дуруга ошиқ бўлади. Жаннинг барча фикрлари энди фақат у ҳақида, у ҳар қандай йўл билан гўзалнинг қалбини забт этиши керак деб ҳисоблайди. Дуру санъат академиясида ўқийди, Дениз исмли ёш бастакор билан яшайди. Гўзал қизнинг ҳам Жанга нисбатан ҳислари бор, лекин бахт сари йўлда енгиб бўлмайдиган тўсиқлар пайдо бўлади.
“Муҳташам юз йил”дан актёрлар: Меҳмет Гунсур, Беррак Тузунаташ, Ўзан Гувен.
- “Севги. Ақл. Қасос” (2021)
Эсра исмли қизнинг ота-онаси кичик кафе эгаси бўлиб, уларнинг иши юришмаяпти. Онаси қизига доимо у каби севишиб эмас, балки ақл билан турмушга чиқишни маслаҳат беради, чунки у қийинчилик ва қашшоқликда яшамаслик учун бой ва келажаги порлоқ эркакни танлаш керак деб ҳисоблайди. Ушбу насиҳатлардан чарчаган қизнинг ўзи Ўзанга турмуш қуришни таклиф қилади. Йигитни муваффақиятли деб аташ қийин: у яқиндагина университетни тамомлаб, иш топган, лекин Эсрага телбаларча ошиқ. Оилавий ҳаёт яхши кечмайди, қиз уни тарк этади ва бир неча йил ўтгач яна уни учратиб қолади. Энди қиз иш излаётган, Ўзан эса унинг иш берувчиси, компания эгаси ва мамлакатнинг энг бой одамларидан бири бўлиб чиқади. Эсра собиқ эрининг эътиборини қайтадан қозониш учун ҳар қандай макрни ишга солиб кўради.
“Муҳташам юз йил”дан актёрлар: Буржу Ўзберк, Себаҳат Кумаш.
- “Афсона” (2021)
Ўрта Осиё тоғларида яшовчи Аккиз исмли қизнинг ҳикояси. Унинг болалиги жуда оғир ўтган: у эрта етим қолган, ўзи учун бошпана ва озиқ-овқат топишга мажбур бўлган. Буларнинг барчасига қизнинг отасини ўлдирган Алпагу хон айбдор эди. Қиз ўзини ҳимоя қилишни ўрганди ва ҳақиқий жангчига айланди. Болалигида у отаси ва қийинчиликда ўтган ҳаёти учун хондан қасос олишга ўз-ўзига ваъда берганди. Ўшандан бери хоннинг бойликларини ўғирлаб, камбағалларга тарқатиб келади. Маҳаллий аҳоли унда ҳақиқий ҳимоячи ва жангчини кўради, лекин бир лаҳзада ҳамма нарса ўзгаради: Аккиз ўз душманининг ўғли билан учрашади.
“Муҳташам юз йил”дан актёрлар: Селим Bayraktar.
- “Шиша ортидаги қиз” (2021)
Налан исмли гўзал қиз — истеъфодаги губернатор ва ўқитувчининг ягона фарзанди. Қизни муҳаббат билан тарбиялашган, лекин унинг ота-онаси бу туйғуни ўзига хос тарзда тушунган: отаси уни эъзозлаб, нозик гулдек муносабатда бўлган, онаси эса қизининг руҳиятини бузадиган жуда кўп нарсалар қилган. Ҳатто вояга етгач ҳам, Налан онасининг маҳкам қўлларидан қутулишга қодир эмас эди. У доим тор корсет кияр ва онасининг сўзларига қулоқ соларди. Онаси ҳатто эркак ҳақидаги фикрни ҳам гуноҳ деб ҳисоблайдиган аёл эди. Ва ниҳоят, аъло таълим олган қиз йирик компанияга ишга жойлашади. Тақдир уни компания эгасининг меросхўри Седат Короглу билан учраштиради. Ота-оналарнинг келишуви асосида қурилаётган никоҳ ёшлар учун бахт келтирмаслиги аниқ эди, чунки ҳар иккисининг ҳам кўнгли бошқа инсонларда.
“Муҳташам юз йил”дан актёрлар: Буржу Бирижик, Селма Эргеш
Изоҳ (0)