Мадриднинг “Реал” клуби ҳужумчиси Килиан Мбаппе ёзги трансферлар вақтида жамоани кучайтириш учун “Арсенал” ҳимоячиси Вильям Салибани олиб келишни таклиф қилган. Бу ҳақда Defensa Central нашрига таяниб Championat хабар берди.
Манбага кўра, Мбаппе “қаймоқранглилар” раҳбариятидан Салиба трансфери бўйича музокараларни бошлашни сўраган. “Реал” футболчини жамоа учун идеал номзод деб билади, бироқ унинг трансфер нархи клуб учун муаммо туғдириши мумкин.
Франциялик ҳимоячининг трансфер қиймати 80 миллион еврога баҳоланмоқда, “Арсенал” унинг 2027 йилгача амал қиладиган шартномасини инобатга олган ҳолда, Салиба учун 100 миллион евро сўраши мумкин.
“Реал Мадрид” футболчининг вакиллари билан ишончли алоқалар ўрнатиб, келажакда уни арзонроқ нархда қўлга киритишни мақсад қилган. Клуб 2026 йилга қадар кутиши ёки 2027 йилда футболчини эркин агент сифатида қўшиб олиши мумкин.
Эслатиб ўтамиз, жорий мавсумда 24 ёшли Салиба “Арсенал” сафида 43 та ўйинда майдонга тушиб, 2 та гол урган.
Изоҳ (0)