Америкалик таниқли бокс шарҳловчиси, мураббий ва таҳлилчи Тедди Атлас ўз подкастида ўзбекистонлик боксчи Баҳодир Жалолов ҳамда америкалик Ричард Торрес ўртасида профессионал боксда реванш жангини кўришни исташини айтди. Бу ҳақда Sports.kz хабар бермоқда.
Атлас икки боксчи ўртасидаги аввалги жанг — 2020 йилги Токио Олимпиадаси финалини эслаб ўтди. Ўша баҳсда Жалолов ғалаба қозониб, ўзининг илк Олимпия олтин медалини қўлга киритган эди.
Торрес — Олимпия кумуш медали соҳиби. Тахмин қилинг, уни финалда ким енгган? Албатта, Жалолов. У Олимпия чемпиони бўлган ва финалда айнан Торресни мағлуб этган. Ҳозир Баҳодирнинг рекорди 15-0, Торресники эса 13-0. Келинглар, бу жангни профессионал рингда кўрайлик! Мен шуни айтаман: агар Торрес яхши тайёрланмаса, у яна мағлуб бўлади, деди Атлас.
Маълумот учун, икки боксчи ҳам март ойида рингга чиққан. Жалолов Қозоғистоннинг Остона шаҳрида Игор Шевадзуцкий устидан қийин ғалабага эришган бўлса, Торрес Лас-Вегасда италиялик Гуидо Вианеллони енгди.
Аввалроқ, Жалолов IBF рейтингида 13-ўринни эгаллагани хабар қилинган эди. Торрес ўзбекистонлик чарм қўлқоп устасидан бир поғона юқорида жойлашган.
Изоҳ (0)