Тошкентдаги Парламентлараро иттифоқ тадбирида Замбия вакили вафот этди 

Тошкентда бўлиб ўтаётган Парламентлараро иттифоқ тадбирида 7 апрель куни Замбия вакили Рой Нгулубе вафот этди. 

Замбия Миллий ассамблеяси котибининг вафотига касаллик сабаб бўлган. Нгулубе Миллий ассамблея спикери Нелли Мутти бошчилигидаги делегация таркибида Тошкентдаги тадбирда иштирок этаётган эди.

Спикер Мутти ҳамкасбини йўқотганидан чуқур қайғуда эканини айтиб, бу муассаса ҳамда бутун мамлакат учун катта йўқотишлигини билдирди.

Миллий ассамблея жаноб Нгулубенинг ўлимидан ҳайратда ва қайғуда, унинг мамлакат олдидаги шарафли хизматларини эътироф этади, деди у.

Рой Нгулубе йигирма йилдан ортиқ вақт давомида парламентда хизмат қилган. У 2002 йил 15 апрелда Миллий ассамблеяга аъзо бўлган ва бир қатор муҳим лавозимларда фаолият юритган. Унинг дастлабки лавозимлари: 2006—2008 йилларда Жанубий Африка тараққиёт ҳамжамияти парламент форумининг қўмита котиби ёрдамчиси ва бош котибнинг ижрочи ёрдамчиси бўлган.

2009—2015 йилларда спикернинг ижрочи ёрдамчиси, 2016—2022 йилларда котиб ўринбосари лавозимида ишлаган. Нгулубе 2023 йил сентябрь ойида Миллий ассамблея котиби этиб тайинланган ва бу лавозимда вафотигача ишлаган. Марҳумнинг жасадини ватанига қайтариш ва дафн маросими билан боғлиқ қўшимча тафсилотлар эълон қилиниши кутилмоқда.