Токио-2020 Олимпиадаси бронза медали совриндори, жаҳон чемпионатининг икки карра кумуш медали эгаси Камшибек Конкабоев яна бир бор ўзининг принципиал рақиби — ўзбекистонлик Баҳодир Жалоловга қарши рингга чиқишга тайёрлигини билдирди. Бу ҳақда Sportnews нашри хабар берди.
Спортчи журналист Акерке Омирҳон билан суҳбатда жанг ташкил қилинса, Жалоловга қарши рингга чиқишга тайёр эканлигини билдирган:
Агар жанг ташкил этилса, Баҳодир Жалолов билан яна бир марта рингга чиқишга тайёрман. Албатта, бу қизиқ жанг бўлади. Ҳозирда профессионал боксда фаолиятимни давом эттириш ёки йўқлиги ҳақида ўйлаб кўряпман, дейди Конкабоев.
Аввалроқ Қозоғистон бокс федерацияси бош мураббийи Қайрат Сатжанов Конкабоев ҳаваскор боксдаги фаолиятини якунлаганини маълум қилганди.
Маълумот учун, ҳаваскор боксда Конкабоев ва Жалолов ўртасидаги оғир вазн тоифасидаги жанглар доимо муҳим қарама-қаршиликлардан бири сифатида қараб келинган. Улар ўзаро 10 марта рингда тўқнаш келишган ва уларнинг аксариятида ўзбекистонлик боксчи ғалаба қозонган.
Изоҳ (0)