“Манчестер Сити” ҳужумчиси Эрлинг Ҳоланд клубни тарк этиши мумкин. Бу ҳақида El Nacional нашрига таяниб Championat хабар бермоқда.
Манбага кўра, 24 ёшли норвегиялик футболчи клубнинг сўнгги натижаларидан норози. Шу сабабли, жамоани тарк этиш вариантини кўриб чиқмоқда. Агар Ҳоланд якуний қарорни қабул қилса, “шаҳарликлар” уни олиб қолишда қийналиши мумкинлиги айтилган.
Футболчининг атрофидаги вазиятни Парижнинг “ПСЖ” ҳамда Германиянинг “Бавария” клублари диққат билан кузатмоқда.
Эслатиб ўтамиз, Ҳоланд Англия Кубогининг чорак финалида “Борнмут”га қарши баҳсда (2:1) тўпиқдан жароҳат олган эди. Клуб бош мураббийи Пеп Гвардиола унга тикланиш учун 5-7 ҳафта керак бўлишини айтган.
Жорий мавсумда Эрлинг Ҳоланд “Манчестер Сити” сафида 40 ўйин ўтказиб, ўз ҳисобига 30 та гол ва 4 та голли узатма ёздириб қўйган. Унинг клуб билан шартномаси 2034 йилга қадар амал қилади. Transfermarkt портал футболчини 200 миллион еврога баҳоламоқда.
Изоҳ (0)