Англия Премьер Лигасининг 31-туридаги “Ньюкасл”га қарши ўйинда “Лестер” бош мураббийи Руд ван Нистелрой 2009 йилда туғилган Жереми Монгани майдонга туширди. Ҳужумчи 15 ёш-у 271 кунлигида дебютини амалга оширди ҳамда Англия чемпионати тарихида майдонга тушган иккинчи энг ёш футболчига айланди.
Монга ўйиннинг 74-дақиқасида захирадан майдонга тушди. Баҳсдан кейин “Лестер” устози Руд ван Нистелрой футболчининг ҳаракатларини юқори баҳолади:
У ажойиб футболчи, тезлиги юқори. Жеремини фантастик истеъдод эгаси деб биламан. Монга ўз меҳнати билан шу даражага эришди. Умид қиламанки, бу натижа — у учун ҳали бошланиши, дейди мураббий.
Шу тариқа, Жереми Англия чемпионати тарихида майдонга тушган иккинчи энг ёш футболчи бўлди. Биринчи ўрин “Арсенал” футболчиси Итан Нваниэрига тегишли — у 2022 йил сентябрь ойида “Брентфорд”га қарши ўйинда 15 ёш-у 181 кунлик чоғида дебют қилганди.
АПЛ тарихидаги энг ёш дебютантлар рўйхатида яна қуйидаги футболчилар бор:
Ҳарви Эллиот, Метю Бриггс (иккаласи ҳам “Фулҳэм”), Иззи Браун (“Вест Бромвич”), Аарон Леннон (“Лидс”), Жозеф Бакстер (“Эвертон”), Гари МакШеффри (“Ковентри”), Рис Оксфорд (“Вест Ҳэм”), Жек Робинсон (“Ливерпуль”) ва Жек Уилшир (“Арсенал”).
Изоҳ (0)