Хонанда Дилдора Ниёзова “Дарё”га берган интервьюсида кўплаб муҳокамаларга сабаб бўлган шахсий ҳаёти ва турмуш ўртоғининг хиёнатини кечиргани ҳақида гапирди.
— Оиламдаги низолардан сўнг халқнинг ёнида ҳам кўринишни истамай қолдим. Орадан анча вақт ўтди, кўп ҳақиқатларни тушуниб етдим. Турмуш ўртоғимнинг хиёнатини кечирдим, кўнглимда унга ҳам ва у аёлга ҳам ҳеч қандай ёмонлигим йўқ. Ҳалигача одамлар орасига кириб борсам, “Сиз шунчалик машҳур аёл бўлиб туриб турмуш ўртоғингизни кечириб яшаяпсизми?” дейишади. “Нима қилибди, Яратган шунча гуноҳларимизни кечиради-ку”, дейман. Бу ҳаётда кўп аёлларни кўрдим. Битта хиёнатга учраса, қасд олмагунга қадар тинчишмайди. Аммо бу билан инсон ўзини ҳам, атрофдагиларни ҳам қийнайди. Инсон кечиролса, яшасин, агар ундай қилолмаса, яхшиси, у инсондан воз кечгани маъқул.
Бу воқеалардан кейин жуда кўп аёллар ижтимоий тармоқлардан алоқага чиқиб, мендан маслаҳат сўрашди. Шунда билдимки, орамизда бундай инсонлар кўп. Аммо бу муаммо эмас, ҳеч бир андуҳни дилда сақламай, шунчаки чиқариб юбориш керак.
Агар ҳозирги ақлим аввалроқ кирганида, мен ижтимоий тармоқлар орқали чиқиш қилмасдим. Аёллигимга бордим ва эмоцияга берилиб турли гапларни гапириб юбордим. Бу учун турмуш ўртоғимдан ҳам кўп марта узр сўрадим. Ҳар бир инсон севишни ва севилишни хоҳлайди. Унга буйруқ бериб бўлмайди, дейди Дилдора Ниёзова.
Хонанда маъмурлик вазифасини турмуш ўртоғи бажармаётгани ва у эски касбига қайтгани ҳақида гапирди.
— Турмуш ўртоғимга суяниб қолган эканман. Кейинчалик тушундимки, аёл фақатгина Яратганга суяниши ва ўз имкониятларига қараб ҳаракат қилиши керак экан. Мухлисларим турмуш ўртоғимга нисбатан бир оз адолатсизлик қилишди. Алфонс деган гаплар унинг кўнглига оғир ботди. Назаримда, аёлининг ортидан кун кўрадиган эркаклар бошқача бўлади, турмуш ўртоғим ундайлар тоифасига кирмайди. Бундай гап-сўзлардан кейин у эски ишига қайтишга қарор қилди. Ҳозир у Андижонда тиббиёт клиникасининг қурилишида ишлаяпти. Яқинда бориб кўриб келдим, усталар қандай аҳволда ишлашса ва яшашса, у ҳам худди шундай меҳнат қиляпти. Яхши шароитдан кейин бу аҳволда ишлолмайди, деб ўйлагандим. Аммо у инсон севимли иши билан шуғулланяпти. Узоқда бўлса-да, фарзандлари ҳақида қайғуряпти.
Яширмайман, авваллари турмуш ўртоғимга ишониб машина ҳам бошқармасдим. Рўзғор, ижоддаги ташкилий ишлар ҳам менинг зиммамда эмасди. Ёлғизлик инсонни пишитар экан, ҳаммасига аста-секин ўрганяпман. Ёлғиз аёлларга Аллоҳдан куч-қувват тилайман, дейди Дилдора Ниёзова.
Суҳбатни тўлиқ ҳолда “Дарё”нинг YouTube каналида томоша қилинг.
Изоҳ (0)