“Тошкент” автовокзалидан Россиянинг Краснодар шаҳрига мунтазам автобус қатновлари йўлга қўйилди. Бу ҳақда Транспорт вазирлиги хабар берди.
Унга кўра, мазкур йўналишда қатновлар Uzautotrans Service корхонаси томонидан ҳафтанинг сешанба ва жума кунлари Yutong автобусларида амалга оширилади. Илк қатнов жорий йилнинг 8 апрель куни бажарилади. Автобус “Тошкент” автовокзалидан соат 20:00 да жўнаб кетади. Чипта нархи 900 000 сўм этиб белгиланган.
Чипталарни электрон шаклда “avtoticket.uz” сайти ҳамда UzBus мобил иловаси орқали, шунингдек, “Тошкент” автовокзали кассаларидан сотиб олиш мумкин.
Ўзбекистонда 10 та янги халқаро автобус йўналиши очилиши айтилганди. Бугунги кунда жами 32 та миллий ва хорижий ташувчилар томонидан Россия, Қозоғистон, Қирғизистон ва Тожикистонга 37 та йўналиш бўйича жами 196 та автобуслар қатнови йўлга қўйилган.
2024 йил январь апрель ойлари давомида халқаро автобус йўналишларида 173 минг нафар йўловчи ташилган. Кўрсаткичлар 2023 йил мос даврига нисбатан 15 фоизга ошган.
Изоҳ (0)