Сенат раиси Танзила Норбоева Парламентарий аёллар форумида Ўзбекистон парламентда хотин-қизлар улуши билан Осиё минтақасидаги энг юқори кўрсаткични қайд этганини маълум қилди.
Унинг сўзларига кўра, сўнгги 30 йилда мамлакатлар парламентларидаги аёллар улушининг 11,3 фоиздан 27,2 фоизгача ўсишида Парламентарий аёллар форумининг ҳам ҳиссаси катта. Ушбу анжуманда 120 га яқин мамлакатдан делегациялар иштирок этаётгани ҳам форумнинг глобал аҳамияти, гендер тенглик масаласи эса ассамблеянинг диққат марказидаги мавзу эканини кўрсатади.
Республика даражасидан, энг қуйи бўғин – маҳаллагача хотин-қизлар масалалари билан шуғулланадиган узвий тизим йўлга қўйилди. Хотин-қизларнинг ижтимоий-иқтисодий фаоллигини ошириш, уларни қўллаб-қувватлаш бўйича янги механизмлар яратилди.
Амалга оширилган ишлар самарасини хотин-қизларнинг таълим, тадбиркорлик, давлат бошқаруви ва бошқа соҳаларда фаоллиги ошишида кузатиш мумкин.
Жумладан, ҳозирги кунда олийгоҳларда таълим олаётган талабаларнинг ярмидан зиёдини қизлар ташкил этмоқда. Бунинг учун ёш хотин-қизларга давлат томонидан турли имтиёзлар жорий этилган. Шунингдек, сўнгги йилларда ишбилармон аёллар сафи икки баробарга кенгайиб 205 мингдан ошди. Мақсад иқтисодиёти йилига 6 фоиздан ўсиб бораётган Ўзбекистонда турли соҳаларда хотин-қизлар тадбиркорлигини кенг ривожлантиришдан иборат экани айтилди.
“Биз ўз сиёсатимизда хотин-қизлар турмуш даражасини ошириш, уларга нисбатан турли нотенгликларни бартараф этиш, айниқса, иқлим ўзгариши салбий таъсирлари, зўравонлик ва камситилишларнинг олдини олишга қаратилган махсус тадбирларни амалга оширишни энг устувор вазифалар сифатида белгилаб олганмиз.
Бугун замоннинг ўзи барчамиздан ўзаро ҳаракатларимизни уйғунлаштириш ва фаоллаштиришни талаб қилмоқда. Биринчи навбатда Ўзбекистон парламентлараро ҳамкорликда аёллар фаоллигини ошириш бўйича халқаро фаолият, айниқса, минтақавий кесимда ўз тажрибаси билан ўртоқлашишга тайёр. Жумладан, беш йил илгари Ўзбекистоннинг ташаббуси билан Марказий Осиё давлатлари етакчи аёллари мулоқоти (диалог) ташкил этилган эди. Бугун ушбу формат хотин-қизларга оид минтақа учун хос бўлган долзарб масалаларни биргаликда ҳал қилишнинг самарали механизмига айланди.
Мазкур ижобий тажрибани Парламентлараро иттифоқдаги бошқа минтақавий гуруҳлар доирасида ҳам жорий этиш ва шу орқали барча минтақалар ривожланишида аёллар иштирокини кенгайтиришни мақсадга мувофиқ, деб ҳисоблаймиз. Иккинчидан, барқарор ривожланиш мақсадлари доирасида мамлакатларимизда гендер тенгликка эришиш борасидаги натижаларни аниқ индикаторларга асосланган ҳолда баҳолаш, бу борада ҳар бир давлат ўз олдига қўйган вазифаларни бажариши юзасидан қўшимча чора-тадбирларни белгилаши тўғри бўларди”, дейди сенат раиси.
Ўзбекистонда Тадбиркор аёллар кенгаши ташкил этилди.
Унинг вазифалари:
- мунтазам равишда ҳудудларга чиқиб, тадбиркор хотин-қизларнинг муаммоларини ўрганиш ва уларни бартараф этиш бўйича таклифлар ишлаб чиқиш;
- тадбиркор аёлларнинг илғор тажрибаларини бошқа ҳудудларда оммалаштиришга кўмаклашиш
- аввал тадбиркорлик лойиҳаларини амалга оширган хотин-қизлар билан манзилли ишлаб, уларнинг муаммоларини ҳал қилиш ва бизнес ғояларини амалга оширишга кўмаклашиш;
- тизимли муаммоларни ҳал қилиш юзасидан ҳукумат ва қонунчилик палатасига таклифлар киритиб бориш.
Тадбиркор аёллар кенгаши Савдо-саноат ҳузурида, 27 кишидан иборат таркибда ташкил этилади. Кенгашга Президент администрацияси масъул ходими Нозима Давлетова раислик қилади.
Изоҳ (0)