Ўзбекистон мусулмонлари идораси раиси, муфтий Шайх Нуриддин Холиқназар 1 апрель куни Андижон вилояти Избоскан туманидаги бахтсиз ҳодиса рўй берган “Аҳмадали ҳожи” жоме масжидини мутасаддилар иштирокида кўздан кечирди, деб хабар бермоқда идора матбуот хизмати.

Қайд этилишича, муфтий воқеа туфайли таъзияли бўлган хонадонларга бориб, ҳамдардлик билдирди. Қуръони карим оятлари ўқилиб, марҳумлар ҳақига бағишланди.

“Муфтий ҳазратлари бошчилигидаги уламолар вафот этганларнинг жаноза намозларида, маърака-маросимларида ҳақларига дуолар қилишди. Марҳумларнинг яқинларига моддий-маънавий тасалли берилди. Тан жароҳати олиб, шифохоналарда муолажа олаётганларга тез фурсатда соғайиб кетишлари тиланди”, дейилади хабарда.
-lif_gUc5.avif)
Маълум қилинишича, ҳалок бўлганларнинг оила аъзоларига Ўзбекистон мусулмонлари идораси томонидан моддий ёрдамлар берилди. Шу билан бирга, амалдаги қонунчиликка асосан моддий ёрдам пули ҳам тўлаш назарда тутилган.
Масжиднинг талафот кўрган қисмини қайта тиклаш ишлари учун ҳам белгиланган тартибда маблағлар ажратилади.
Избоскан туманидаги масжид таҳоратхонасидаги портлаш
31 март куни масжид таҳоратхонасида газ-ҳаво аралашмасининг чақнаши оқибатида уч киши ҳалок бўлиб, 10 киши турли жароҳатлар билан шифохонага ётқизилган. Ҳодиса натижасида таҳоратхона девор ва том қисмига зарар етган, ёнғин содир бўлмаган. Ҳолат юзасидан жиноят иши қўзғатилди.
Бахтсиз ҳодиса оқибатида ҳалок бўлган фуқароларнинг оила аъзоларига ҳар томонлама кўмаклашиш ҳамда жабрланган фуқароларга тез тиббий ёрдам кўрсатиш, ушбу бахтсиз ҳодисанинг келиб чиқиш сабабларини ўрганиш, шунингдек, бу каби фавқулодда вазиятларнинг олдини олиш мақсадида Вазирлар Маҳкамасининг тегишли фармойиши қабул қилинди. Фармойиш билан бош вазир ўринбосари Очилбой Раматов бошчилигида ҳукумат комиссияси тузилди.
Изоҳ (0)