Андижон вилоятида алиментдан қарздор ота шифер ортидан топилди. Бу ҳақда МИБ ахборот хизмати “Дарё”га хабар берди.
Унга кўра, фуқаролик ишлари бўйича Андижон туманлараро судининг ижро варақасига асосан қарздор Б.Д.дан ундирувчи Г.М. фойдасига икки нафар фарзанди таъминоти учун алимент тўлаб бориши белгиланган. Бироқ бюро ходимлари томонидан огоҳлантиришларга қарамасдан, қарздор фарзандини моддий таъминлашдан бўйин товлаб келган ва алимент қарздорлиги 26 млн сўмга етган.
Қарздорликни ундириш мақсадида бир неча маротаба қарздорнинг яшаш манзилига борилганда у ердан топилмагани сабабли унга нисбатан қидирув эълон қилинган. Бюронинг вилоят бошқармаси қидирув шуъбаси ходимлари томонидан олиб борилган қидирув тадбирлари натижасида фуқаро ўз ҳовлисининг қурилиши тугалланмаган ҳудудида шифер ортига яширинган ҳолатда топилди.
Ҳозирда қарздорга нисбатан жиноят ишлари бўйича Андижон шаҳар суди томонидан 15 сутка маъмурий қамоқ жазоси тайинланди.
Алиментдан қочган оталар ҳақида
Наманган вилояти Чортоқ туманида алимент тўлашдан қочиб юрган эркак уй ертўласидан топилганди. Қарздор ота томонидан қарздорлик 20 миллион сўмдан ортган. Ишлаш мақсадида Тошкент шаҳрига кетгач, унга нисбатан қидирув эълон қилинган. Ходимлар томонидан Тошкентдаги хонадон яшаш жойлари пухта кўздан кечирилганда, ертўлага яшириниб олгани аниқланган. Унга нисбатан 15 суткалик маъмурий қамоқ жазоси тайинланган.

Қашқадарё вилояти Яккабоғ туманида алимент тўламай қочиб юрган эркак Тошкентдаги молхонадан топилган. Вояга етмаган фарзандлари учун тўланмаган алимент миқдори 3 миллион 200 минг сўм экани айтилган.

Шунингдек, Наманган вилояти Чуст туманида алимент тўлашдан қочиб юрган эркак Оҳангарондан топилган. Ўтказилган суҳбат мобайнида қарздорлик салкам 15 миллион сўмга етгани, уни бартараф этиш лозимлиги тушунтирилган. Қайд этилишича, у яна масъулиятни ҳис этмаган ва унга нисбатан жиноят иши юритилган.
Андижон вилояти Шаҳрихон туманида эса алимент тўлашдан қочиб, уйининг ертўласида яшириниб юрган эркак ушланиб, 15 суткага қамалган.
Энг антиқа ҳолатлардан бири, Наманган вилоятида алимент тўламай юрган эркак бошқа хотинининг уйида яширингани аниқланган. Унда қарздорлик тўпланиб, 24,3 миллион сўмга бориб етган эди.

Шу каби, Қашқадарёда МИБ ходими 2 йилдан бери қидирувда бўлган қарздор эркакни беркинаётган жойида топиб олган. Тадбир жараёнида ходимлардан бири уйнинг болохонаси ва томини текшираётган пайтда, иккинчи ходим йиқитилган кўрпалар тагидан фуқарони олиб чиқди.
Шу куннинг ўзида қарздор мавжуд 28 миллион 971 минг сўм алимент қарздорлигини тўламагани сабабли Жиноят ишлари бўйича Яккабоғ туман суди томонидан Б.Бухаровга нисбатан 15 сутка маъмурий қамоқ жазоси тайинланган.

Сурхондарё вилояти Ангор туманида алимент тўламай, 2 йилдан буён қидирувда бўлган эркак уй ертўласидан топилган.

Тошкентда учта хотинига алимент тўламаган эркакнинг қарзини 4-хотини тўлагани ҳақидаги ҳолат ҳам кузатилган. Шундан сўнг суд томонидан қарздорга нисбатан тўпланган ҳужжатлар қайта кўрилиб, етказилган зарар миқдори қоплангани сабабли 15 суткалик қамоқ жазосини тўлиқ ўтамасдан озод қилинган.

Изоҳ (0)