Қозоғистон терма жамоаси бош мураббийи вазифасини бажарувчи Али Алиев Ўзбекистон терма жамоасининг жаҳон чемпионати йўлланмасини деярли қўлга киритгани ҳақида ўз фикрларини билдирди. Бу ҳақда “Sportnews.kz” нашри хабар бермоқда.
Мураббий Лихтенштейн устидан (2:0) қозонилган ғалабадан кейин матбуот анжуманида қатнашиб, унда Марказий Осиё терма жамоаларининг саралашдаги ўйинларига тўхталди:
Ҳа, биз ўзимизни қўшнилар билан солиштиришни яхши кўрамиз: Қирғизистон Қатарни мағлуб этди, Ўзбекистон эса деярли Жаҳон чемпионатининг финал босқичига йўлланма олди. Қирғизистон ҳам, Ўзбекистон ҳам уч марказий ҳимоячи билан ўйнаб, керакли натижага эришиб келмоқда. Агар биз ҳам Осиё қитъаси саралаш босқичида қатнашсак, шубҳасиз, мундиалга чиқамиз. Лекин Осиё футболи даражасини ортиқча баҳоламаслик керак, деди мутахассис.
Маълумот учун, Қозоғистон Европа қитъаси саралаш босқичида иштирок этади. Улар Бельгия, Уэлс, Шимолий Македония ва Лихтенштейн каби жамоалар билан бир гуруҳдан жой олган. Жамоа 2 турдан кейин 3 очко тўплаб, 3-ўринни эгаллаб турибди.
Изоҳ (0)