Россияда фуқароларнинг интернетдаги фаолиятини таҳлил қиладиган ва улар ҳақида электрон маълумотлар тўпламини шакллантирувчи рақамли платформани жорий этиш режалаштирилмоқда. Россия Рақамли ривожланиш вазирлиги бу борада давлат харидлари порталига тегишли тендер эълонини жойлаштирди. Бу ҳақда The Moscow Times хабар берди.
Тизим кунига 360 миллион қўнғироқ, 77 миллион ижтимоий тармоқ фойдаланувчиси ва 10 миллион онлайн транзакцияни қайта ишлайди. Агар алгоритмлар суҳбат ёки хабарни шубҳали деб топса, улар дарҳол блокланади. Маълумотлар Ички ишлар вазирлиги, банклар ва интернет-провайдерлардан олинади.
Кузатув учун сунъий интеллект ишлатилади, у барча коммуникация даражаларига, яъни мобил операторлардан тортиб махсус иловагача интеграция қилинади. Тизим фойдаланувчи фаолиятини таҳлил қилиш, қурилмаларда ишга туширилган дастурларни назорат қилиш, шу жумладан, мессенжерлар ва банк иловаларини, шунингдек, “зарарли ёки жосуслик” дастурий таъминотини аниқлаш имкониятига эга бўлади.
Бундан ташқари, тизим фуқароларнинг жойлашувини аниқлаб, мобил алоқа операторлари, банклар, Ички ишлар вазирлиги, Тергов қўмитаси, Бош прокуратура ва “Росфинмониторинг” билан маълумотлар алмашади.
Алоқа операторлари фойдаланувчиларнинг SIM-карталари ёки IMEI-кодларини алмаштириш тўғрисидаги маълумотларни, Давлат хизматлари портали эса паролларни ўзгартириш, алоқа маълумотлари ва тизимга киришга уринишлар ҳақидаги маълумотларни узатиши шарт бўлади.
Россия Марказий банкининг баҳолашича, 2024 йилда ҳар учинчи россиялик фирибгарларга дуч келган, тармоққа тарқалган ёзувлар сони эса 700 миллиондан ошган. Юқоридаги чоралар айнан фирибгарликни олдини олишга қаратилгани айтилмоқда.
Изоҳ (0)