1969 йилда СССРда суратга олинган “Бриллиант қўл” фильми совет кинематографиясининг энг яхши комедияларидан бири ҳисобланади ва ҳанузгача томошабинлар орасида жуда машҳур. Ёш-у қари томошабинлар ушбу шедевр картинани ҳали ҳам қайта-қайта томоша қилишдан завқланади. Бироқ фильмда кўпчилик эътибор қаратмаган битта кулгили хатолик бор. Эҳтимол, айнан хатолиги туфайли ҳам фильм янада кулгили чиққан.
Гап Горбунковнинг ўз манзилини такси ҳайдовчисига қандай айтгани ҳақида. Ўша эпизодда актёр Морская 21, 9-хонадон, учинчи кириш йўлаги, учинчи қават, дейди. Бу манзил кўпчиликда ҳеч қандай савол туғдирмаган. Аммо мантиқан ўйлаб қаралса, тўққизинчи сонли хонадон учинчи қаватнинг учинчи подъездида жойлашган бўлиши мумкин эмас.
Агар уй фақат уч қаватдан иборат бўлса ва ҳар бир қаватда фақат битта хонадон жойлашган бўлса, у ҳолда манзил тўғри келиши мумкин. Аммо фильмда ҳар бир қаватда 3-4 та хонадон жойлашган одатий беш қаватли бино тасвирланади.
Сценарийга кўра, аслида Никулин “биринчи подъезд, учинчи қават” деб айтиши керак эди ва бундай манзил мантиқан тўғри бўлар эди. Комедиядаги мазкур саҳна шунчаки эътибордан четда қолган, деб ўйлашимиз мумкин, аммо хатоликни Гайдай дарҳол пайқаган ва ушбу саҳна бир неча марта қайта суратга олинган. Аммо энг яхши дубль айнан манзил хато айтилган дубль бўлади ва режиссёр ҳолатни ўзгаришларсиз қолдиришга қарор қилади.
Изоҳ (0)