Россия Қуролли кучларининг Курск вилоятидаги бўлинмалари Украина ҳарбийларига зарба берувчи дронлар ёрдамида ҳужум қилишнинг янги тактикасини қўллай бошлади. Бу ҳақда Forbes хабар берди.
Маълум қилинишича, дрон йўл устида парвоз қилиб туриш ўрнига, нишон унинг ёнидан ўтишини ерга қўнган ҳолда кутади. Бу усул қимматбаҳо аккумулятор қувватини тежаш имконини беради. Украина ҳарбий техника колоннаси ёнидан ўтгач, дрон яна ҳавога кўтарилади.
Учувчисиз самолёт ҳавога кўтарилди, колоннани таъқиб қилиб, юк ортилган пикап томон йўл олди. Дрондан олинган видео узилиб қолган, шунинг учун у нишонга тегдими ёки йўқми, номаълум. Нима бўлганда ҳам, у жуда яқин учиб ўтди, дейилади хабарда.
Forbes шарҳловчиси Девид Акснинг тушунтиришича, бундай тактика янги эмас, чунки бир неча ойдан бери энг яхши украиналик дрон операторлари шундай қилмоқда, чунки ёндашувнинг ўзи маҳорат ва операцияларни пухта режалаштиришни талаб қилади.
Агар радиобошқарувли дрон нотўғри жойда ишга туширилса, оператор алоқани йўқотиши мумкин. Агар оптик толали дрон нотўғри жойда қўндирилса, унинг сигналларни узатиш ва қабул қилиш учун ишлатадиган оптикаси чигаллашиб кетиши мумкин, дея таъкидлади Акс.
Бундан ташқари, таҳлилчи Эндрю Перпетуанинг сўзларига кўра, россияликлар йўлларнинг қатнов қисмида пистирмалар ҳам қурмоқда.
РФ қуролли кучлари йўлларга дронларни қўндириб, уларни ёнидан ўтиб кетаётган автомобиллар остида портлатиш орқали тузоқлар ташкил қилмоқда. Бу дронлар, эҳтимол, юқорига йўналтирилган зарядлардан фойдаланган ҳолда танкка қарши миналар каби ишлайди, таъкидлади Перпетуа.
Изоҳ (0)