Тошкент вилояти Янгийўл туманида икки фуқаро 52 та каптарни нобуд қилди. Бу ҳақда Экология вазирлиги хабар берди.
Унда айтилишича, Тошкент вилояти Экология, атроф-муҳитни муҳофаза қилиш ва иқлим озгариши бошқармаси томонидан ҳайвонот дунёсини муҳофаза қилишга қаратилган навбатдаги назорат тадбири ўтказилган. Янгийўл тумани ҳудудида ўтказилган рейдда фуқаролар Н.Р. ҳамда Н.С. томонидан 52 та каптар ноқонуний равишда овлангани аниқланган.
Натижада табиатга 19 миллион 500 минг сўм миқдорда зарар етказилган. Ҳолат юзасидан ҳуқуқбузарларга нисбатан Маъмурий жавобгарлик тўғрисидаги кодекснинг 90-моддаси 4-қисми билан маъмурий баённома расмийлаштирилди.
Ҳолатга қонуний баҳо бериш учун ҳужжатлар жиноят ишлари бўйича Янгийўл тумани судига юборилмоқда.
Маълумот учун, Ўзбекистон Республикасининг 2020 йил 8 июлдаги “Ов қилиш ва овчилик хўжалиги тўғрисида”ги 627-сонли қонунига мувофиқ, жорий йилнинг 1 мартидан 15 августга қадар ов мавсуми ёпилди. Бу вақтда ёввойи ҳайвонлар ва қушларни овлаш қатъиян тақиқланади.
Аввалроқ Айдар-Арнасой кўлларида 2024 йили ноқонуний ов оқибатида табиатга 1,7 млрд сўмлик зарар етказилгани ҳақида хабар берилганди.
Шунингдек, Навоийда ноқонуний балиқ овлаган шахслар табиатга 6,3 млрд сўм зарар етказгани ҳақида хабар берилганди.
Бундан ташқари, Сурхондарё вилояти Шўрчи туманида ноқонуний балиқ овланиши натижасида табиатга 1,4 миллиард сўм зарар етказилган эди.
Ўзбекистон ҳудудида 2025 йил 1 сентябрдан 2028 йил 1 январгача ов қилишга мораторий жорий қилиниши мумкинлиги айтилганди.
Изоҳ (0)