Ўзбекистонда 14 март куни олтин қуймалар нархи рекорд даражада ошди. Бу ҳақда Марказий банк маълум қилди.
Бир грамм олтин нархи 1 миллион 272 минг 440 сўмни ташкил этди. Бу бир кун аввалги нархдан 1,6 фоизга юқоридир. 20 февралда ўрнатилган аввалги рекордга нисбатан қимматбаҳо металл нархи 0,6 фоизга ошган. Икки ярим ой ичида нархлар 12,4 фоизга, йиллик кўламда эса 41,4 фоизга ўсган.
14 март ҳолатига кўра олтин қуймалари нархи қуйидагича бўлди:
- 5 граммли олтин қуйма — 6 миллион 362 минг сўм;
- 10 граммли олтин қуйма — 12 миллион 724 минг сўм;
- 20 граммли олтин қуйма — 25 миллион 449 минг сўм;
- 50 граммли олтин қуйма — 63 миллион 622 минг сўм;
- 100 граммли олтин қуйма — 127 миллион 224 минг сўм.
100 граммли олтин қуймалар Ўзбекистонда 2025 йил 17 январдан бошлаб сотувга чиқарилганди.
Financial Timesънинг ёзишича, йил бошидан бери олтин АҚШнинг янги президенти Дональд Трампнинг савдо сиёсати ва жаҳон савдосидаги кескинликнинг кучайиши фонида энг даромадли активга айланди.
Олтин қуймалари ҳақида
Олтин қуймалар — оғирлиги 5, 10, 20, 50, 100 грамм бўлган, 999,9 софликдаги олтиндан тайёрланган қуймалар. Махсус ҳимоя қадоқларида сотув учун тақдим этилади. Олтин қуймаларнинг қадоғи сертификат вазифасини бажаради ва ўз серия рақамига эга бўлади. Улар ҳимояланган қадоқларда сотилади ва уларни бемалол уйда ёки банкда — индивидуал банк ячейкаларини ижарага олган ҳолда сақлаш мумкин. Уларнинг нархи бир ҳафта ичида бир неча марта ўзгариши мумкин. Олтин қуймаларини фақат банкларга сотиш мумкин.
Олтинга инвестиция киритиш ишончлими?
Олтин бошқа металлар сингари гиперинфляция ва молиявий бозорлардаги глобал тартибсизлик даврида ҳам нол даражада қадрсизланмайди. Шу маънода у ҳақиқатан ҳам қимматли қоғозлар ва валютага қараганда ишончлироқдир.
Изоҳ (0)