Қашқадарё вилоятида тадбиркордан Солиқ органлари томонидан ундириб олинган 520 миллион сўм қайтиб берилмаяпти. Бу ҳақда “Ҳамкор Таъминот Голд Инвест” МЧЖ раҳбари Жамшид Эшонқулов “Дарё”га маълум қилди.
Тадбиркор Жамшид Эшонқуловнинг айтишича, у Жиноят ишлари бўйича Косон туман судининг 2024 йил 22 июндаги ҳукмига кўра Жиноят кодексининг 184-моддаси (солиқлар ёки йиғимларни тўлашдан бўйин товлаш жуда кўп миқдорда содир этилган бўлса) ва бошқа бир нечта моддаларга кўра айбли, деб топилган. Ҳукмга кўра, 587 миллион сўми Косон туман давлат солиқ инспекцияси (ДСИ) нинг тегишли ҳисоб рақамига ўтказиб берилган.
Орадан икки йил ўтиб — 2024 йилнинг 13 сентябрь куни Қашқадарё вилоят жиноят ишлари бўйича судлов ҳайъати апелляция инстанциясида Жиноят ишлари бўйича Косон туман судининг 2022 йил 22 июндаги Жамшид Эшонқуловга нисбатан чиқарилган ҳукми қисман ўзгартирилган. Яъни Жамшид Эшонқуловнинг қилмишида жиноят аломатлари бўлмаганлиги сабабли Жиноят кодексининг 184-моддасининг 3-қисми билан айбсиз деб топилган.
Ҳукмга кўра, Косон туман ДСИдан Жамшид Эшонқуловга 520 миллион сўмни қайтариб бериш белгиланган. Қолган 66 миллион сўм маъмурий иш материали билан бирга ҳал қилиш учун қолдирилган.
МИБ ахборот хизматининг “Дарё”га маълум қилишича, қарздорликни Жамшид Эшонқулов фойдасига ундириш мақсадида Қашқадарё вилоят ДСБнинг барча ҳисоб рақамларига банд солинган.
Келгусида қарздорлик бартараф этилмаган тақдирда, ундирув қарздорнинг мол-мулкларига қаратилади, дейилади МИБ изоҳида.
Давлат солиқ қўмитасининг “Дарё”га тушунтириш беришича, “Ҳамкор Таъминот Голд Инвест” МЧЖ Косон туманлараро иқтисодий судининг ҳал қилув қарорига асосан, 2024 йилда корхона банкрот деб эътироф этилиб, давлат реестридан чиқарилган. Шу сабабли бугунги кунда 520 миллион сўм маблағни корхона ҳисоб рақамига қайтаришнинг имкони бўлмаган.
“Қашқадарё вилоят солиқ бошқармаси томонидан Ж.Эшонқулов фойдасига 520,9 миллион сўм ундириш белгиланган Суд ажрими бўйича вилоят жиноят ишлари бўйича судлов ҳайъати тафтиш инстанциясига тафтиш шикояти киритилди”, дейилади Давлат солиқ қўмитаси изоҳида.
Изоҳ (0)