Германиянинг 13 аэропортида Ver.di хизмат кўрсатиш соҳаси ходимлари касаба уюшмаси томонидан ходимларнинг огоҳлантирувчи бир кунлик иш ташлашлари бошланди.
Иш ташлашлар душанба куни соат 00:00 да бошланиб, сешанба куни соат 23:59 гача давом этиши кутилмоқда.
Иш ташлашлар Берлин, Бремен, Гамбург, Ганновер, Дортмунд, Дюссельдорф, Мюнхен, Штутгарт, Франкфурт Майн аэропортларида, шунингдек Кёльн/Бонн ва Лейпциг/Галле аэропортларида ўтказилмоқда. Дюссельдорф яқинидаги Веце ва Карлсруэ/Баден-Баден аэропортларида эса фақат авиация хавфсизлиги бўлими ходимлари иш ташлашга қўшилган.
Германия аэропортлари бирлашмаси АDV маълумотларига кўра, Ver.di касаба уюшмаси эълон қилган иш ташлаш оқибатида 3400 дан ортиқ парвоз бекор қилиниши ва 510 мингга яқин йўловчининг режалари ўзгариши мумкин.
Касаба уюшмаси иш ҳақини 8 фоизга, бироқ ойига камида 350 еврога оширишни, шунингдек оғир меҳнат учун қўшимча тўловларни кўпайтириш ва ходимларга қўшимча дам олиш кунлари берилишини талаб қилмоқда. Баёнотда таъкидланишича, иш ташлаш “тахминан 25 минг ходимнинг меҳнат шароитларини яхшилаш” учун зарур.
Ноябрь ойида Финляндиянинг Finnair авиакомпанияси учувчилар касаба уюшмасининг иш ташлаши сабабли 9 ва 13 декабрь кунлари 300 га яқин рейсни бекор қилганди. Октябрь ойида эса Бельгиядаги Шарлеруа халқаро аэропорти хусусий хавфсизлик компанияси ходимларининг иш ташлаши сабабли барча учиб кетиш рейсларини бекор қилишга мажбур бўлганди.
Изоҳ (0)