Футбол бўйича Испания чемпионатининг 27-тури доирасидаги “Барселона” – “Осасуна” ўйини кеча, 8 март куни бўлиб ўтиши керак эди. Ушбу ўйин бошқа кунга қолдирилди.
Каталония клуби тиббий бўлими ходими, жамоа шифокорларидан бири Карлес Минярро Гарсиянинг учрашув олдидан вафот этгани сабабли баҳс ўтказилмайдиган бўлди. Клуб хабарни расман тасдиқлади.
Cadena SER хабарига кўра, футболчилар ўйинни кўчиришни ўзлари сўраган. Шифокор учрашув олдидан жамоа билан битта меҳмонхонада бўлган. Ўлим сабаблари ҳозирча маълум эмас. У меҳмонхонадан ўлик ҳолда топилган.
40 ёшли Карлес Минярро 2017 йилдан буён клуб тизимида ишлаб келаётганди. Жорий мавсумда у футзал жамоасидан футбол жамоасига ўтказилган эди.
“Барселона” футбол клуби чуқур қайғу билан бугун кечқурун асосий жамоа шифокори Карлес Минярро Гарсиянинг вафот этганини маълум қилади. Шу сабабли “Осасуна” билан ўйин бошқа муддатга кўчирилди.
“Барса” директорлар кенгаши ва барча ходимлари ушбу оғир дамда унинг оиласи ва дўстларига самимий ҳамдардлик билдирамиз”, дейилади клуб баёнотида.
“Реал” жамоаси ва клуб президенти ҳам “Барселона” шифокори вафотидан чуқур қайғуда эканини билдирган.
Изоҳ (0)