Тошкент вилоятида энергия ресурсларидан ноқонуний фойдаланган шахслар аниқланди, деб хабар берди Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, Оққўрғон туманида фуқаро А.Н.га тегишли “Зарафшон” МФЙ ҳудудидаги нотурар бинода фуқаро О.Р. тижорат мақсадида умумий фойдаланишдаги электр тармоғига тўғридан-тўғри уланган. Натижада 224,7 млн сўмлик электр энергиясидан ноқонуний фойдаланилган.
Шунингдек, Бўстонлиқ туманида фуқаро А.А. ва бошқалар “Ҳожикент” МФЙ ҳудудидаги хонадонда тижорат мақсадида умумий фойдаланишдаги электр тармоғига тўғридан-тўғри уланган. Оқибатда 141,1 млн сўмлик электр энергиясидан ноқонуний фойдаланган.
Бундан ташқари, Оҳангарон туманида “С.Ш.” оилавий корхонаси масъул шахслари “Ялпоқтепа” МФЙ ҳудудидаги умумий овқатланиш шохобчасида тижорат мақсадида умумий фойдаланишдаги газ тармоғига тўғридан-тўғри уланган ва 170 млн сўмлик табиий газдан ноқонуний фойдаланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Бундай ҳолатлар сони ортиб бормоқда
Аввалроқ Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди
- Қорақалпоғистоннинг учта ҳудудида 845 млн сўмлик газдан ноқонуний фойдаланилди
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
- Учта вилоятда қарийб ярим млрд сўмлик газдан ноқонуний фойдаланилди
Изоҳ (0)