Тошкент шаҳрининг Сергели тумани “Хонтепа” маҳалласидаги ички кўчалардан бири лойли, аҳоли ҳаракатланиши учун ноқулай экани хабар берилган эди. Ҳокимлик ахборот хизмати ҳолат назоратга олинганини маълум қилди.
Ижтимоий тармоқлар орқали Сергели тумани “Хонтепа” маҳалласи, Тараққиёт кўчасидаги йўлни асфалт қилиш бўйича мурожаат қолдирилган. Бу маҳалла аввал Тошкент вилояти Зангиота туманига қарашли бўлиб, кейинчалик Сергели туманига ўтган. Ушбу маҳалладаги Тараққиёт кўчаси 2021 йилда Вазирлар Маҳкамасининг 702-сонли қарорига мувофиқ босқичма-босқич асфалтлаштириш дастурига киритилган. Бундан ташқари, 2024 йилда ушбу кўчада Д-150 диаметрли узунлиги 3000 п/м ичимлик суви тармоғи ўтказилганлиги сабабли йўлни таъмирлаш ишлари тўлиқ якунланмаган. Шу боис, мазкур мавсумда “Хонтепа” маҳалласида асфалтлаш ишлари юқоридаги қарорга мувофиқ амалга оширилиши режалаштирилган бўлиб, Сергели туман ҳокимлиги мазкур жараённи назоратга олганини маълум қиламиз, дейилади ҳокимликнинг бу ҳақдаги муносабатида.
Аввалроқ “Дарё”да туманнинг “Жўнариқ” маҳалласида жойлашган кўп қаватли уйларда яшовчи 1500 дан ортиқ хонадон вакиллари ишга бориб-келиш, шунингдек, шаҳар марказига чиқишда йўлсизликдан қийналаётгани ҳақида хабар берилганди. Сергели тумани ҳокимлиги ушбу ҳолатга эътибор қаратиб, аҳолининг эркин ҳаракатланиши учун муаммо туғдираётган лойли йўлни асфалтлаштирди.
Изоҳ (0)