Ўзбекистон мусулмонлари идораси Фатво марказининг 2025 йил учун закот нисоби, фитр садақа ва фидя миқдори бўйича қарори эълон қилинди.
Унга кўра, Фатво маркази бу йилги рамазон ойи учун закот нисобини 85 грамм 585 пробали тилланинг қийматидан келиб чиқиб 61 млн 200 минг сўм деб белгилади. Шунга асосан, кимда зарурий эҳтиёжидан ташқари камида 61 млн 200 минг сўм қийматидаги пул маблағи ёки ушбу қийматдаги савдо-тижорат моли бўлса, жами маблағининг қирқдан бири (2,5 фоиз)ни закот ниятида ҳақдорларга беради.
Фитр садақасининг миқдори қуйидагича белгиланди:
- 2 кг буғдой унидан — 10 000 (ўн минг) сўм;
- 4 кг арпадан — 16 000 (ўн олти минг) сўм;
- 2 кг майиздан — 110 000 (бир юз ўн минг) сўм;
- 4 кг хурмодан — 180 000 (бир юз саксон минг) сўм деб белгиланди.
Ҳар ким ўз имкониятига қараб ушбу тўрт маҳсулотдан хоҳлаган бири ёки унинг қийматини фитр садақаси ниятида берса кифоя қилади.
Фидя миқдори
Бир кунлик фидя миқдори фитр садақанинг миқдори билан бир хил бўлади. Шундай экан, ҳар ким ўз имкониятига қараб ушбу тўрт маҳсулотдан хоҳлаган бири ёки унинг қийматини фидя ниятида берса кифоя қилади.
Ўзбекистонда рамазон ойи 1 март, шанба куни бошланади. Президент қарорига кўра, ушбу ойда эҳтиёжмандлар ҳамда илм-маърифат йўлида изланаётган ёшларга ёрдам бериш бўйича ташаббусларни қўллаб-қувватлашга, атроф-муҳитни асраш, муқаддас қадамжо, зиёратгоҳ ва қабристонларни ободонлаштириш, кўчатлар экишга ҳамда рамазон ойи билан боғлиқ тадбирларда меъёрга амал қилиш ва исрофгарчиликка йўл қўймасликка алоҳида эътибор берилади.
Изоҳ (0)