Чили ҳудудининг катта қисми 25 февраль электр таъминотидан узилди. Сантяго шаҳри, шунингдек, тоғ-кон саноати ҳудудлари зарар кўрди. Бу ҳақда Deutsche Welle хабар берди.
Чили Ички ишлар ва жамоат хавфсизлиги вазирлигига кўра, гап шимолдаги Арика шаҳридан мамлакат жанубидаги Пуэрто-Монт шаҳригача бўлган ҳудуд ҳақида кетмоқда. Чилида уй хўжаликларининг қарийб 80 фоизи электр таъминотисиз қолган. 26 февралга ўтар кечаси блекаут туфайли фавқулодда ҳолат эълон қилинган, Сантягода эса комендантлик соати жорий этилган.
Сантягода блекаут фонида кўча чироқлари ўчган ва метро ишламай қолган. Дунёдаги энг йирик Эскондида мис рудаси конида ҳам электр энергияси узилган. Ўз навбатида, Codelco мис рудаси қазиб олиш давлат концерни барча конлари блекаутдан зарар кўрганини маълум қилган.
Чили фуқаролик авиацияси бошқармасига кўра, блекаут Артуро Мерино халқаро аэропорти фаолиятига таъсир кўрсатмаган. Бироқ LATAM Airlines авиакомпанияси баъзи рейсларга узилишлар таъсир қилиши мумкинлигини айтган. Чили ички ишлар вазири Каролина Тоа киберҳужумни истисно қилган, узилиш сабаблари номаълум. Аҳолига “яқин соатларда” электр таъминоти тикланиши айтилмоқда.
Маймун сабаб электр таъминоти узилди
Эслатиб ўтамиз, 9 февраль куни Шри Ланкадаги электр подстанциясига кириб қолган маймун бутун мамлакат бўйлаб электр таъминотида узилишга олиб келди. Маймун иштирокидаги ҳодиса Коломбо жанубидаги шаҳар чеккасида содир бўлган. Энергетика вазири Кумара Жаякоди маймун электр тармоғидаги трансформаторга тегиб, тизимда мувозанат бузилишига сабаб бўлганини айтган. У носозликлар учун аҳолидан узр сўраган эди
Изоҳ (0)