Кеча, 24 февраль куни Миллий матбуот марказида Микрокредитбанкнинг 2024 йилдаги йиллик сарҳисоби ва 2025 йилда амалга оширилаётган ишлари бўйича матбуот анжумани бўлиб ўтди. Тадбирда ҳунармандчилик ҳамда касаначиликни қўллаб-қувватлаш орқали кичик бизнес, хусусий ва якка тартибдаги тадбиркорликни ривожлантириш, янги иш ўринларини яратиш ҳамда қишлоқ жойларда микромолиявий хизматларни кенгайтириш масалалари муҳокама қилинди.
Кредит олиш жараёнлари соддалаштирилди
Ижтимоий дастурларни амалга ошириш департаменти директори ўринбосари Бобур Ражапов банк томонидан ишлаб чиқилган “Маврид” иловаси ҳақида маълумот берди. Унинг сўзларига кўра, ушбу илова орқали жорий йилда “Оила кредити” платформаси интеграция қилинди.
“Эндиликда мижозлар банкка боришга ҳожат қолдирмай, илова орқали кредит олиш аризасини топширишлари ва барча жараёнларни масофадан туриб амалга оширишлари мумкин. Бу орқали ортиқча оворагарчиликларнинг олди олинди” , — деди Ражапов.
Бундан ташқари, аҳолига хизматларни таништириш мақсадида маҳалла агентлари ва банкларга қўлланмалар, буклет ҳамда флаерлар тарқатилди.
Муаммоли кредитлар ва киберхавфсизлик бўйича ислоҳотлар
Матбуот анжуманида муаммоли кредитларни қайтариш бўйича Микрокредитбанк томонидан амалга оширилган чоралар ҳам муҳокама қилинди. Мутахассисларнинг таъкидлашича, банк тузилмасида махсус хизмат кўрсатувчи гуруҳлар ташкил этилиб, улар малакали кадрлар билан тўлдирилди. Ўтган йилги кўрсаткичлар билан солиштирилганда, жорий йилнинг дастлабки икки ойида самарали натижаларга эришилган.
Шунингдек, Чакана бизнес департаменти мутахассиси Шахбоз Абдуғаниев киберхавфсизлик ва банк тизимида амалга оширилаётган янги хавфсизлик чоралари ҳақида маълумот берди. Банк карталарида хавфсиз транзакцияларни таъминлаш учун Visa карталарида 3D Secure код тизими жорий этилди.
“Агар мижоз ўз шахсини тасдиқламаган бўлса, карталар орқали пул ўтказмалари амалга оширилмайди. Ҳар бир транзакция мижознинг шахсий идентификациясидан сўнг амалга оширилади” , деди мутахассис.
Маҳаллабай иш олиб бориш ва бандликни таъминлаш
Маҳаллабай ишлаш ва ҳудудий лойиҳаларни бошқариш департаменти директори Ғолиб Саноевнинг таъкидлашича, Президент Шавкат Мирзиёев раислигида 2024 йил 16 декабрь куни ўтказилган видеоселектор йиғилишида белгиланган чора-тадбирлар доирасида Микрокредитбанк зиммасига 2025 йилда 320 минг нафар аҳолини бандлигини таъминлаш вазифаси юклатилган.
Ушбу мақсадга эришиш учун маҳалла тизими доирасида янги механизмлар йўлга қўйилди. Хусусан, бугунги кунда Микрокредитбанк томонидан 332 та маҳалла банки фаолияти ташкил этилиб, уларга 1121 та маҳалла бириктирилган. Мазкур маҳаллаларда аҳолининг молиявий саводхонлигини ошириш ва тадбиркорлик лойиҳаларини молиялаштириш бўйича ишлар олиб борилмоқда.
Ғолиб Саноевнинг таъкидлашича, 2025 йилнинг дастлабки икки ойида 51 минг нафар аҳоли бандлиги таъминланган. Улардан 18 минг нафари доимий ишга жойлаштирилган, қолганлари эса тадбиркорлик фаолиятига жалб қилинган. Банк томонидан ушбу мақсадлар учун бир триллион сўмдан ортиқ кредит маблағлари ажратилган.
Микрокредитбанк 2024 йилда қатор муҳим ютуқларга эришган бўлса, 2025 йилда эса янада кенг қамровли ислоҳотларни амалга оширишни режалаштирмоқда. Банкнинг асосий мақсади – аҳолининг тадбиркорлик билан шуғулланиши учун қулай молиявий шароит яратиш, кредит олиш жараёнларини соддалаштириш ва янги иш ўринларини ташкил этишдан иборат.
Реклама ҳуқуқи асосида.
Изоҳ (0)