Президентнинг “Томорқа ер эгалари ва деҳқон хўжаликлари фаолиятида замонавий ташкилий тизимни жорий қилиш ва молиявий қўллаб-қувватлашнинг қўшимча чора-тадбирлари тўғрисида”ги фармони қабул қилинди. Бу ҳақда Адлия вазирлиги хабар берди.
Фармонга кўра, Деҳқон хўжаликлари ва томорқа ер эгалари фаолиятини қўллаб-қувватлаш жамғармаси маблағлари ҳисобидан бир қатор молиявий қўллаб-қувватлаш тартиблари жорий этилади.
Жумладан, ҳар йили 500 та маҳаллада биттадан аҳоли томорқасида амалга оширилган энг намунали ва инновацион лойиҳа учун БҲМнинг 100 бараваридан (37,5 млн сўм) ошмаган миқдорда грантлар ажратилади.
Шунингдек, уста деҳқонлар томонидан қисқа муддатли ўқув курсларини ташкил этиш билан боғлиқ харажатларни қоплаш учун ҳар бир курс учун БҲМнинг 15 бараваригача (5 млн 625 минг сўм) миқдорда субсидия ажратилади.
Шу билан бирга, муайян маҳалладаги 50 фоиз хонадонларнинг томорқасида экспортбоп маҳсулот етиштиришни йўлга қўйиб берган уста деҳқонларга 100 млн сўмгача субсидия ажратилади.
Бундан ташқари, томорқа ер эгалари ва деҳқон хўжаликлари ҳамда уларга хизмат кўрсатувчи субъектларга тижорат банклари орқали қишлоқ хўжалиги маҳсулотларини етиштириш, уларни қайта ишлаш, қуритиш, сақлаш ва қадоқлаш лойиҳалари учун 2 йилгача имтиёзли давр билан 7 йилгача муддатга Марказий банк асосий ставкасидан 4 фоизлик пункт юқори ставкада (шундан 5 фоиз банк маржаси) кредитлар ажратилади.
Аҳоли томорқалари ва ижара ерларида ихчам музлаткичли омборхоналар, қадоқлаш, қуритиш ва қайта ишлаш ускуналари, тайёр ҳолдаги иссиқхоналар 24 ойлик имтиёзли давр билан 5 йилда бўлиб тўлаш шарти билан лизингга берилади.
Аввалроқ фармон билан Камбағалликни қисқартириш ва бандлик вазирлигига қўшимча вазифа ва функциялар юклангани ҳақида хабар берилганди.
Қишлоқ хўжалиги Ўзбекистон иқтисодиётининг 25 фоизини ташкил қилади. Фермердан тортиб оддий ишчигача миллионлаб инсонлар банд бўлган ушбу соҳа мамлакатимиз озиқ-овқат хавфсизлиги учун жуда муҳим. Шу боис ҳам сўнгги йилларда қишлоқ хўжалиги билан боғлиқ жиддий ислоҳотлар олиб борилмоқда.
Аввалроқ Ўзбекистонда қишлоқ хўжалиги маҳсулотлари етиштирувчиларга сув етказиб бериш хизматлари учун тўловлар бекор қилиниши айтилганди.
Изоҳ (0)