“Ньюкасл” футболчиси жамоадоши Александр Исакни дунёнинг энг яхши футболчиси дея эътироф этди

Бразилиялик ярим ҳимоячи, “Ньюкасл Юнайтед” футболчиси Бруно Гимараэш, жамоа ҳужумчиси Александер Исакнинг ўйинига баҳо берди.

“Мен учун у дунёнинг энг яхши ҳужумчиси. Ҳеч ким ундан яхшироқ ўйнамайди. Унинг жамоамиз таркибида бўлиши бизнинг омадимиз. Умид қиламанки, у шу тарзда ҳаракат қилишда давом этади. Жамоа билан кубокни кўтариш ва клуб тарихига номимизни ёздириш орзудаги иш бўларди. Бу мен учун, айниқса, сардор сифатидаги биринчи мавсумимда юқори аҳамиятга эга, дейди Гимараэш ESPN нашрига.

Бу фикрлар “Ньюкасл” Англия Лига кубоги финалига чиққанидан сўнг билдирилди.

Маълумот учун, клуб Лондоннинг “Арсенал” клубини икки учрашув натижасига кўра 4:0 ҳисобида мағлуб этди. Швед футболчиси Александер Исак жамоасининг биринчи ўйинидаги дастлабки голга муаллифлик қилганди. Жавоб баҳсида ҳам у 4-дақиқада ҳисобни очди, аммо гол VAR томонидан кўриб чиқилгач бекор қилинди — офсайд.

Бугун, 6 февраль куни иккинчи ярим финал жавоб баҳсида “Ливерпуль” “Тоттенҳэм”га қарши ўйнайди. Дастлабки учрашув “шпорлар”нинг (1:0) ғалабаси билан якунланган эди.

Англия Лига Кубоги.

Ярим финал жавоб баҳси

5 февраль, чоршанба

“Ньюкасл” — “Арсенал” 2:0

Голлар: 1:0 — Мерфи (19), 2:0 — Гордон (52).

“Ньюкасл”: Дубравка, Ҳолл, Триппиер, Берн, Ботман (Крафт, 80), Шер, Тонали (Лонгстафф, 87), Бруно Гимараэс (Майли, 90+1), Мерфи (Уиллок, 80), Гордон, Исак (Уилсон, 87).

“Арсенал”: Райя, Габриэль, Салиба, Тимбер (Калафиори, 78), Льюис-Скелли, Райс, Парти (Жоржинио, 78), Эдегор (Стерлинг, 61), Троссар (Мерино, 61), Ҳаверц, Мартинелли (Нванери, 37).

Огоҳлантиришлар: Ҳаверц (42), Салиба (44), Гимараэс (47), Стерлинг (83), Шер (90+2).

Биринчи ўйин натижаси — 2:0.