Британия қироллик оиласининг аъзоси, шаҳзода Гаррининг турмуш ўртоғи Меган Маркл ўзининг Instagram саҳифасида самимий видеони жойлаштирди. Унда Лос Анжелесдаги ёнғинлар туфайли бошпанасидан айрилган 15 ёшли қизнинг орзусини қандай амалга оширгани ҳақида сўзлаб берди.
Бир неча ҳафта олдин Меган Маркл ва шаҳзода Гарри Калифорниядаги ўрмон ёнғинлари туфайли вайронага айланган Алтадена шаҳрига ташриф буюрди. У ерда собиқ актриса 15 ёшли қиз ва унинг онаси билан учрашди. Ёлғиз она ва фарзанди яшаган уй тўлиқ ёниб кетган эди. Қизалоқнинг сўзларига кўра, ёнғинда йўқотганидан афсусда бўлган энг қадрли нарса — бу Билли Айлиш концертида олган севимли футболкаси эди.
Меган бундай қўшиқчини шахсан танимаслигини айтди, аммо мактаб ўқувчисига ўша футболкани қайтариш учун қўлидан келганича ёрдам беришини ваъда қилди.
Сўнг шаҳзода Гаррининг рафиқаси ижтимоий тармоққа мазкур видеони жойлаштирди ва у ўсмир қизнинг истагини амалга оширгани ҳақида сўзлаб берди.
Маълум бўлишича, Сассекс герцогиняси Билли Айлиш учун овозли хабар ёзиб олган ва хонандани излаб топишни кўплаб танишларидан илтимос қилган. Билли Айлишга унинг хабари етиб келгач, у қизалоққа ёрдам беришга рози бўлган. 23 ёшли қўшиқчи мухлисаси истаган нарсани юборган. Совға-саломлар ичида футболкадан ташқари, дастхат қўйилган ланчбокс, кийим-кечаклар ҳам бор эди.
Сассекс герцогиняси хонанда ва актёр Адам Левин ҳамда унинг рафиқаси Беҳати Принслу Билли билан боғланишига кўмаклашгани учун алоҳида миннатдорлик билдирди.
Изоҳ (0)