Ижтимоий тармоқларда хонанда Дилдора Ниёзованинг 2 февраль куни Жиззах шаҳрида ўтказилиши керак бўлган концерт дастури қолдирилгани, томошабинлар бир неча соат уни кутишгани ҳақидаги хабарлар пайдо бўлди. Бундан ташқари, тўйхонада уни Миллий гвардия ходимлари қўриқлаётгани билан боғлиқ видеолар ҳам кўплаб муҳокамаларга саабаб бўлди. “Дарё” мухбири хонанданинг продюсери ва турмуш ўртоғи Латиф Юсупов билан боғланди.
— Бу концерт аслида 22 декабрда бўлиши керак эди. Бу ташкилотчилар билан 4-5 йилдан буён ишлаймиз. Ишончли одамлар деб билардик. Шунинг учун ҳам концертолди улардан “заклад” пулларини сўраганимиз йўқ. Хуллас, маъмурларимиз бир кун олдин ташкилотчилар билан боғланиб “Пул тайёрми? Муаммо бўлмайдими?” деб сўрашганида “Ҳаммаси тайёр, бемалол келаверинглар”, дейишган. Аввало, мухлислар учун борилади, тўғри, аммо сафарга жамоа учун оз-мунча маблағ сарфланмайди.
Хуллас, тўйхонага етиб борганимизда ташкилотчилар узр сўраб, пул йўқлигини айтишди. Буни қандай тушуниш мумкин, деб бир оз жаҳлимиз чиқди. Бу ерда бошқа гап бор эди, кейин билсак, ташкилотчиларнинг шериги пулни олиб қочиб кетган экан. Дилдора “Майли, биринчи сеансни хайрия қилиб ўтказайлик, мухлислар ранжишмасин”, деди. Концертни ўтказганимиздан кейин, ташкилотчилар “17:00 даги концертни қолдирамиз, биз шу ерда туриб, келганларга чипта пулини тарқатамиз”, дейишди. У ерда ташкилотчилардан ташқари, тўйхона эгаси ва Миллий гвардия ходимлари ҳам бор эди. Кечки сеансдаги концертнинг асосий чипталарини қайсидир ташкилот сотиб олган экан. Раҳбари билан гаплашиб, вазиятни тушунтирдик. “Шундай бўлишини билгандик”, дейишди.
“Айрим мухлислар 7-8 соат кутдик”, деб ёзишаётган экан. Аммо у ерда шунча вақт кутиладиган вазият бўлгани йўқ. Томошабинларнинг рақами бўлганида қўнғироқ қилиб чиқардик. Одамлар тўғри тушунишсин, бизни ҳам алдашди. Аввалига ҳисобга умуман пул тушмаган, дейишди. Ундан кейин пулни олиб қочиб кетган, дейишди. Чипта пуллари еб юборилган, деган вариант ҳам бор, дейди Дилдора Ниёзованинг турмуш ўртоғи Латиф Юсупов.
Латиф Юсупов Дилдора Ниёзованинг ресторанда Миллий гвардия ходимлари ҳамроҳлигида ҳаракатланаётгани акс этган видеога ҳам ўз муносабатини билдирди.
— Ходимларни биз ёллаганимиз йўқ. Оммавий тадбирларни ўтказаётганда тартибни сақлаш учун қўриқчилар ёлланиши шарт этиб белгиланган. Уларни ташкилотчилар ёллашган. Аммо концерт нол даражада ташкиллаштирилган. Одам жуда ҳам кўп эди, тартибга умуман эътибор беришгани йўқ. Концерт тўйхонада ўтгани учун кўпчилик видеони нотўғри тушунаётган экан. Яна бир жиҳат, ташкилотчилар “пул тушмади”, дейишди. Аммо катта тўйхонада бирорта бўш ўриндиқ кўрганимиз йўқ. Одамлар ҳам чиптани нақд пулга сотиб олишганини айтишмоқда, дейди хонанданинг турмуш ўртоғи.
Дилдора Ниёзова ҳам Instagramъдаги саҳифаси орқали алоқага чиқиб, мухлисларининг саволларига жавоб берди.
— Ҳаётда баъзан инсонни ўйлантириб қўядиган вазиятлар бўлар экан. Бундан нолиш ҳам нотўғри аслида. Бошга тушганни кўз кўради. Инсон яхши бир ният қилади, аммо сиз ўйламаган нарсалар бўлади баъзан. Ҳозир Жиззахдан келиб, интернетга кирсам мен ҳақимда ҳар хил гап-сўзлар бўлаётган экан. Илтимос, мени қарғаманг, билиб-билмай, масаланинг тагига етмай, мени қарғаманг. Менга бировнинг ортиқча пули, ҳаққи керак эмас. Яратганнинг бергани менга етади. Қанча бўлса ҳам, бу мен учун хайрли. Ҳалолидан берсин, харомидан Худо сақласин.
Мана ҳозир йўлдан келиб, жойимда тинчгина ухлолмадим. Менга нимага керак, халқнинг пулини емаганман-ку, деб ёцам ҳам бўларди, лекин мен ижодкор бўлганим учун ҳамма гап менга келиб тақалади. Мен концертни ўтказиб келдим. Шунча халқ йиғилганини кўриб, тўғриси, йиғлаб юбордим. Шунчалик халққа севимли санъаткор эканлигимдан хурсандман. Концертларимнинг ташкилий масалалари билан турмуш ўртоғим шуғулланадилар. Улар гаплашганимизда ҳаммаси яхши дедилар. Бу вазиятда айбдор санъаткор бўлиб туюлади, лекин санъаткорнинг ортида нечта одам туради? Ташкилотчиларга, бундай ишларни ўйлаб қилинглар, бировнинг ҳаққи тешиб чиқади, деган бўлардим.
Концертнинг биринчи сеансига борганимдаёқ ҳафсалам пир бўлди, чунки турмуш ўртоғим келиб пул муаммо бўлаётганини айтдилар. Шу ўринда айтиб кетай, мен умуман концерт қўйгим келмайди. Санъатда 20 йилдан бери бўлсам, шунча пайт ичида концертлардан чарчаганман. Мен қўрқиб қўшиқ айтаман. Сабаби қилаётган ишим тўғримикан, нотўғримикан, деган ўй мени қийнайди.
Халқнинг йиғилганини кўриб, пулни олмаган бўлсам ҳам, кириб қўшиб куйладим. Менга ташкилотчи пулингизни бир ҳафтада қилиб берамиз, деди. Мен эса “Менга пулингиз керак эмас, ҳозир борича биринчи сеанс учун пулни оламан, лекин иккинчи сеанснинг пулини одамларга қайтариб беринг”, дедим. Биринчи сеанс учун ҳам келишилган пулнинг ярмининг ярмини ҳам беришмади. Ўша пулни олиб, созандаларимга бердим. Чунки улар оила боқувчиси, дейди хонанда.
Изоҳ (0)