“Ўзгидромет” иш ҳафтаси давомида кузатиладиган об-ҳаво прогнозини эълон қилди.
Унга кўра, 27 январь куни Ўзбекистонда қуруқ ва нисбатан илиқ об-ҳаво кутилмоқда, фақатгина республиканинг шимолий ҳудудлари совуқ антициклон таъсирида бўлиб, ҳарорат кундузи 0-5 даража илиқдан ошмайди.
28 январда Қорақалпоғистон Республикаси ва Хоразм вилоятининг айрим ҳудудларида бир оз қор ёғади, Бухоро, Навоий ва Самарқанд вилоятларида кечаси бир оз ёғингарчилик (ёмғир, қор) бўлиши мумкин. Республиканинг қолган ҳудудларида ёғингарчилик кузатилмайди. Ҳаво ҳарорати кундузи 5-10 даража илиқ, республиканинг шимолий ҳудудларида 2 даража совуқ -3 даража илиқ бўлади.
29—31 январда совуқ ҳаво массалари Ўзбекистоннинг шимолий ҳудудларидан бутун республика ҳудудига тарқала бошлайди, ҳаво ҳарорати кечаси 0-5 даража совуққача, шимолий ҳудудлар баъзи жойларида 8 даража совуққача, кундузи 0-5 даража илиққача пасаяди.
Республиканинг марказий ва жануби-шарқий вилоятларида 29—31 январда вақти-вақти билан ёғингарчилик бўлиб, асосан, қор шаклида ёғади. Қорақалпоғистон, Хоразм, Бухоро, Навоий вилоятларида ёғингарчилик кузатилмайди.
Республиканинг айрим жойларида туман тушиши мумкин. Тошкент ва Наманган вилоятларининг тоғли ҳудудларида қор кўчиши хавфи мавжуд.
Тошкентда душанба ва сешанба кунлари ёғингарчилик кузатилмайди. Ҳаво ҳарорат 27 январда 9-11 даража илиқ, 28 январда кечаси 0-2 даража илиқ, кундузи 6-8 даража бўлади. 29—31 январда вақти-вақти билан қор ёғади. Кечаси ва эрталаб туман тушиши мумкин. Ҳаво ҳарорат кечаси 0-2 даража совуқ, кундузи 0-2 даража илиқ бўлади.
Изоҳ (0)