Америкалик актриса Кемерон Диас кино саноатида ишламаган ўн йиллик танаффус вақти ҳаётининг “энг яхши йиллари” бўлганини тан олди. Бу ҳақда у The Graham Norton Show дастурида айтиб ўтди.
“Айтиш лозимки, менга бу танаффус жуда ёқди. Фильмларда суратга тушмаган йилларим ҳаётимда ўтказган энг яхши вақт бўлди. Мен ўзимни авваламбор она, рафиқа ролида кўрдим ва жуда бахтли ҳаёт кечирдим”, деди Диас.
Актрисанинг қўшимча қилишича, у кино соҳасига қайтганидан ҳам мамнун. Ўн йиллик танаффусдан сўнг Диас Netflix стриминг платформаси томонидан тақдим этилган “Back in action” (“Яна ишга”) фильмида суратга тушди.
Кемерон Диас “Шрек 5” фильмидаги Фиона образига яна бир бор озов беришни истайди. Шунингдек, агар Жим Керри ҳам иштирок этса, 1994 йилда суратга олинган “Ниқоб” комедиясининг давомида суратга тушишга ҳам дарҳол рози бўлади.
Диаснинг таъкидлашича, кино соҳасидан узоқлашиш унга оиласи билан кўпроқ вақт ўтказиш ва руҳан дам олиш имконини берди. Актриса фильмларда суратга тушишни рад қила бошлаганидан сўнг бир неча йил унга роллар таклиф этилаверди. Аммо вақт ўтиб таклифлар келиши тўхтади.
Узоқ муддатли танаффусдан кейин кинога қайтишни Диас “катта имконият” деб атади:
“Агар мен уни қўлдан бой берсам, одамларга кулги улашадиган фильмлар яратишга бўлган иштиёқим сўниб қолади. Ҳозирги имкониятдан фойдаланмаслик аҳмоқлик билан баробар”, деди у.
Маълумот учун, 2018 йилда Кемерон Диас кинодан кетишга қарор қилиб, оиласи билан кўпроқ вақт ўтказишни истаганини айтганди. Диаснинг ижтимоий тармоқларидаги профили энди унинг юлдуз эмас, балки уй бекаси эканлигини кўрсатади. Профил тавсифида биринчи ўринда “она”, иккинчи ўринда эса “актриса” деб ёзилган.
“Кинода суратга тушаётганингда сенга худди тўлиқ эгалик қилишгандек бўлади. Суратга олиш майдончасида кунига 12 соатлаб бир неча ой ишлайсан. Бошқа нарсаларга вақт қолмайди. Мен ҳаётимнинг бир қисмини бошқа одамларга бераётганимни англадим. Улар умримни олиб қўйишмоқда эди. Шунчаки ҳаётимни қайтариб олишим, ҳаётим учун масъулиятни ўз зиммамга олишим кераклигини тушуниб етдим”, дея тушунтирган эди Кемерон.
Изоҳ (0)