“Манчестер Сити” клубининг футбол бўлими директори Чики Бергистайн Ўзбекистон терма жамоаси ва “шаҳарликлар”нинг янги ҳимоячиси ҳақида фикр билдирди.
“Шаҳарликлар” директори футболчининг улкан салоҳиятга эга эканини таъкидлаб, Etihadга кўчиб ўтаётганидан хурсанд эканини билдирди.
“Биз уни сафларимизга қўшилганидан жуда мамнунмиз ва унинг жамоага ҳисса қўшишини сабрсизлик билан кутмоқдамиз. Ёш бўлишига қарамай, Абдуқодир жуда ақлли футболчи. У кучли, агрессив ва ниҳоятда тезкор.
Пеп билан ишлаш уни янада кучлироқ қилади. У билан гаплашиб, доимо ўз устида ишлашга қатъий қарор қилганини англадим. Унинг келиши Европадаги энг яхши жамоалардан бири сифатида ўз мавқейимизни мустаҳкамлаш учун ажойиб имкониятдир.
“Манчестер Сити” клубидаги барча Абдуқодирни жамоада қарши олишдан мамнун”, деди Чики Бергистайн.
“Манчестер Сити” клуби ўзбекистонлик ҳимоячи Абдуқодир Ҳусанов 4,5 йилга мўлжалланган шартнома имзолади. Абдуқодир ўзига 45-рақамни танлаган.
Шу тариқа Абдуқодир Ҳусанов Англия Премьер Лигасида ўйнайдиган биринчи ўзбек футболчисига айланади. Англиянинг юқори дивизионида футболчилари ўйнаган давлатлар сони эса 119 тага етади.
Маълумот учун, “Ланс” Ҳусановни 2023 йил июль ойида “Энергетик-БГУ”дан 100 минг еврога сотиб олганди. Ҳусанов Франция клуби сафида 31 та ўйинда майдонга тушиб, бир марта голли узатма амалга оширди.
Изоҳ (0)