“Франция ва Ланс шаҳрига самимий қабул учун катта раҳмат” – Абдуқодир Ҳусанов “Ланс” билан хайрлашди (видео)

“Манчестер Сити” клуби аъзосига айланган Абдуқодир Ҳусанов собиқ жамоаси “Ланс” ва унинг мухлислари билан хайрлашди.

Ҳусанов ўз мактубида қуйидаги жумлаларни ёзиб қолдирди:

“Азиз дўстлар, юрагимда алоҳида ўрин тутган ва Европадаги илк катта саргузаштим бўлган ”Ланс“ жамоаси билан хайрлашиш вақти келди.

Франция ва Ланс шаҳрига самимий қабул учун катта раҳмат! Франция менга эшикларини очди, французлар менга меҳрибон эди. Бунинг учун сизларга раҳмат. Франция – имкониятлар мамлакати, менга француз маданияти, француз тили ва албатта француз футболи жуда ёқди.

Ўтган бир ярим йил давомида мени қўллаб-қувватлаган барчага чуқур миннатдорлик билдираман. Уилл Стилл бошчилигидаги ҳозирги ва Фрэнк Эз бошчилигидаги олдинги мураббийлар штабига ишонч ва ривожланишимдаги ҳиссалари учун катта раҳмат.

Жамоадошларимга ташаккур. Биринчи кунданоқ меҳр билан қарши олиб, мослашишга ёрдам бердингиз. Сизлар туфайли майдонда ҳам, майдон ташқарисида ҳам ўзимни уйдагидек ҳис қилдим.

Стадион ва машғулот базасидаги ходимларга, ишчиларга ҳам раҳмат. Ва, албатта, ”Ланс“нинг ажойиб мухлисларига катта раҳмат. Сиз жамоангиз учун ҳамма нарсага тайёр бўлган ҳақиқий армиясиз. Бизни олға етакладингиз, сўнгги нафасимизгача тинмай қўллаб-қувватладингиз.

Фаолиятимда мени янги синов кутиб турибди, лекин бу ерда бошдан кечирганларимни ҳеч қачон унутмайман. ”Ланс“ доимо юрагимда қолади ва менинг бир қисмим ҳамиша ”Санг эт Ор“ бўлиб қолади.

”Ланс“нинг бир бўлаги бўлганимдан фахрланаман”.

“Манчестер Сити” клуби ўзбекистонлик ҳимоячи Абдуқодир Ҳусанов билан шартнома имзолади. Ҳусанов ва клуб ўртасида 4,5 йиллик шартнома имзоланиш кутилаётган эди. Романо ҳам ўз ижтимоий тармоғидаги саҳифасида шартнома имзоланганини тасдиқлади. Келишувга кўра, шартномани яна бир йилга чўзиш мумкин. Абдуқодир ўзига 45-рақамни танлаган.

Шу тариқа Абдуқодир Ҳусанов Англия Премьер Лигасида ўйнайдиган биринчи ўзбек футболчисига айланади. Англиянинг юқори дивизионида футболчилари ўйнаган давлатлар сони эса 119 тага етади.

Маълумот учун, “Ланс” Ҳусановни 2023 йил июль ойида “Энергетик-БГУ”дан 100 минг еврога сотиб олганди.

Ҳусанов Франция клуби сафида 31 та ўйинда майдонга тушиб, бир марта голли узатма амалга оширди.