ПФЛ клубларга қулайлик яратиш мақсадида регламентнинг “Суперлига ва Пролига регламенти”нинг 17-бобини тушунарли кўринишга келтирди. Янги мавсумда клуб либос дизайнини ишлаб чиқаётганда мазкур талабларга эътибор қаратиши лозим бўлади.
Регламентга кўра, 2025 йилдан бошлаб ҳар қандай клуб ўз мухлислари кўз ўнгидаги уй учрашувида асосий либосда майдонга тушиши талаб этилади. Ўтган мавсумлар давомида бу жиҳат мураббийлар кайфияти ёки уларнинг айримлари амал қиладиган иримлардан келиб чиқиши оқибатида учрашув комиссарлари қатор қийинчиликларга дуч келди. Шундан келиб чиқиб, ҳар бир клуб ўз майдонида қандай либосда ҳаракат қилиши масаласини мавсум аввалида ҳал қилиб олиши ва уни мавсум сўнгига қадар ўзгартирмаслиги талаби регламентдан жой олди. Бу ўз навбатида севимли жамоаси иштирокидаги уй ўйинига ташриф буюраётган ишқибозлар учун ҳам қулайликка олиб келади.
Шунингдек, футболчи ўз лицензиясида кўрсатилган рақамли футболкада ўйинга қўйилади. Ҳар қандай клуб мазкур масалага профессионал нуқтаи назардан ёндашиши, ўзининг U21 ва U19 жамоалари учун ҳам асосий таркибники каби либослар тақдим этиши муҳим аҳамият касб этади. Бундай ҳолатда кейинчалик асосий таркибга жалб этиладиган футболчида ўз либоси ҳамда рақами билан Суперлига ёки Пролига беллашувида майдонга тушиш учун имконият бўлади.
Либослар ва ундаги ёзувлар рангида ҳам ўзгаришлар бор. Унга кўра, барча ёзувлар бир хил рангда бўлиши керак. Оч рангли футболкада тилла рангли ёзувлардан фойдаланиш мумкин эмас.
Бундан ташқари, ташкилот футболчиларнинг исм-фамилияси ўзбек тилида ёзилишини талаб қилиш ҳуқуқига эга бўлади.
Изоҳ (0)