Қирғизистон Миллий хавфсизлик давлат қўмитаси раҳбари мамлакатда аралаш жанг санъатлари (MMA) мусобақаларини тўхтатишга чақирди.
Баёнотни Ташиев ижтимоий тармоқда жонли эфир орқали қилган. Унинг сўзларига кўра, MMA ёшларда муваффақиятга эришиш учун муштлашиш, куч ишлатиш ёки зўравонлик етарли, деган нотўғри тушунчани шакллантиради.
“Аралаш жанг санъати – бу спорт эмас, балки урушнинг бир кўриниши. Бундай мусобақалар ёшларда зўравонлик ва агрессия билан муваффақиятга эришиш мумкин деган нотўғри қарашни пайдо қилади. Биз таълим ва илм-фанга эътибор қаратадиган авлодни тарбиялашимиз керак,” деди Ташиев.
Унинг таъкидлашича, бу фаолият нафақат маънавий қадриятларга зарар етказади, балки соғлиқ учун ҳам хавфли. У кўплаб MMA жангчилари 40 ёшга етмасдан ногирон бўлиб қолишини таъкидлади.
Ташиев спортчиларни ва MMA мусобақаларига тайёрланаётган ёшларни давлат томонидан қўллаб-қувватланадиган, жисмоний ривожланишга ёрдам берадиган Олимпия спорт турларига ўтишга чақирди.
У бошқа мамлакатларда MMA’нинг машҳурлиги ҳақидаги баҳоналарни рад этди ва Қирғизистон ўз қадриятлари ва устувор йўналишларига эътибор қаратиши кераклигини таъкидлади.
“Исломий нуқтаи назардан ҳам, бундай ҳаракатлар нотўғри — бир-бирини калтаклаш ва майиб қилиш қабул қилинмайди,” деди у.
Ташиев Олимпия қўмитаси, спорт ассоциациялари ва Маданият ва спорт вазирлиги ҳузуридаги спорт бўлимига мамлакатда MMA’ни чеклаш бўйича қатъий чора кўришга чақирди.
Изоҳ (0)