Черногориянинг Сетине шаҳри чеккасида 1 январь, чоршанба куни бир эркак барда ўт очди, сўнг кўчага чиқиб, ўткинчиларга қарата ўқ отишни бошлади. Оқибатда камида 12 киши ҳалок бўлди, деди мамлакат ички ишлар вазири Данило Саранович.
Унинг сўзларига кўра, ҳалок бўлганларнинг икки нафари муассаса эгасининг фарзандлари. Бар эгасининг ўзи ҳам ўқ тегиши оқибатида вафот этган. Бундан ташқари, бир неча киши жароҳатланган.
Вижести телеканалига кўра, отишма олдидан барда муштлашув бўлган. Полициянинг фикрича, отишмага мафия ўртасидаги ўзаро тўқнашув эмас, балки оддий маиший можаро сабаб бўлган, деб хабар беради DPA агентлиги. Отишма содир этган шахс қочиб кетган. "Ички ишлар вазирлигининг барча кучлари уни қўлга олиш учун сафарбар қилинди", деди Саранович журналистларга.
Кейинроқ ички ишлар вазири ҳужумчи Сетинедаги уйи ёнида ўз жонига қасд қилишга уринганини маълум қилди. 45 ёшли эркак олган жароҳатлари туфайли касалхонага олиб кетилаётганда вафот этди, дея қўшимча қилди Саранович.
Черногория ҳукумати фавқулодда йиғилишда уч кунлик мотам эълон қилишга қарор қилди. Бош вазир Милойко Спаич телевидение орқали жонли эфирда қилган чиқишида воқеани "даҳшатли фожиа" деб атади.
Изоҳ (0)