Қизиқчи Маҳфуза Шербоева узоқ йиллик ижара қийинчиликларидан сўнг Тошкентдан иккита уй олгани ҳақида гапирди

Яккахон ижод қиладиган ягона ўзбек аёл қизиқчиси Маҳфуза Шербоева “Миллий” телеканалининг “Осмондан тушган юлдузлар” кўрсатувига интервью берди. Қизиқчи интервью давомида ижарада яшаётган уйидан ҳайдалгани ва ўз уйида устачилик қилгани ҳақида гапирди.

— Тошкент аэропортининг ёнида 12 қаватли дом бор, ўша ерда дугонам билан ижарада яшардик. Уй эгаси бўлди уйни бўшатинглар, бошқа одам қўяман, деганида уйдан чиқиб кетганмиз. Оёқ кийимим узилиб кетган, елимлаб, йиртиқ оёқ кийимда кўчада юрганман. Уйдан чиқиб кетгач, борар жойимиз йўқ — иккимиз ҳам бир оғиз гапирмай аэропортнинг йўлидан кетаверганмиз. Охири дугонамнинг Тошкентда шунча одамга уй бор, наҳот бизга бўлмаса деган гапидан кейин роса излаб-излаб, бир уй топганмиз. Ҳар хил синовли кунлар бўлган, лекин барчасига шукр қиламан, дейди қизиқчи.

— 2018 йилда бир хонали уй олганман. Уста олиб келдим — ундай қиламиз, бундай қиламиз, деди ва уста ҳақи 700 доллар бўлишини айтди. Менда бунча пул йўқ деб, ўзим бозорга бориб, савдолашиб, уйга керак барча қурилиш молларини олиб келганман. Устачиликдан хабари бор рус қўшнимдан ёрдам беришини сўраганман — мен уни меҳмон қилардим, у эса ёрдам берарди. Лекин уйимнинг кўп қисмини ўзим таъмирлаганман, дераза пардаларни ҳам ўзим тикканман, деди Маҳфуза Шербоева.

— Ҳозирги янги уйимда ёлғиз яшайман, буни ҳам таъмирлаш ишлари тепасида бошидан охиригача ўзим турганман. Шу уйимни олаётганимда сотувчи билан 10 миллион сўмга келишолмай қолганмиз — уй нархини 820 миллион сўм дейишган, менинг қўлимда 810 миллион сўм бўлган. Йўқ, бу нархга сотмайман деган. Кечаси билан агар шу уй хайрли бўлса менга насиб қил, дея Худодан сўраб чиққанман. Эртасига эрталаб ўша инсон қўнғироқ қилиб, мен айтган нархга рози бўлган. Ёлғиз яшайсиз, бир ўзингиз зерикмайсизми деб кўп сўрашади. Йўқ, қайтага маза қиламан — китоб ўқийман, YouTube’дан қизиқчи устоз санъаткорларнинг видеоларини ва санъаткорларнинг интервьюларини томоша қиламан, дейди ижодкор.

— Пул йиғишга маҳкамман, беҳудага пул сарфламайман. Бир танишим яхши жойдан ер олиб тўйхона қурдиринг, кунига беш миллиондан тушса ҳам бир ойда 150 миллион бўлади, дея шу бизнес билан шуғулланиш таклифини бериб қолди. Ҳа, аввалига бева-бечора ва етимларга эҳсон қилиб дастурхон ёзаман-да, кейин бизнесни бошлайвераман, дея ўйлаб қолдим, деди қизиқчи.

Қачон турмушга чиқасиз деган саволга, насиб қилганида дея кулиб жавоб берди Маҳфуза Шербоева.